ललितपुर – नेकपा एमालेका अध्यक्ष केपी शर्मा ओली पक्राउको विरोधमा प्रदर्शन गर्ने क्रममा एक ज्येष्ठ नागरिकमाथि दुर्व्यवहार गर्ने व्यक्ति पक्राउ परेका छन् । गृहमन्त्री सुदन गुरुङको निर्देशनपछि ललितपुर प्रहरीले रामशरण शर्मा बजगाईंलाई नियन्त्रणमा लिएको हो ।

केही दिनअघि एमाले कार्यकर्ताले प्रदर्शन गर्ने क्रममा बाटोमा हिँडिरहेका वृद्धमाथि अभद्र व्यवहार गरेको भिडियो सामाजिक सञ्जालमा भाइरल भएको थियो ।

उक्त घटना सार्वजनिक भएलगत्तै गृहमन्त्री गुरुङले संलग्नलाई कारबाही गर्न प्रहरी प्रशासनलाई निर्देशन दिएका थिए । पक्राउ परेका बजगाईंलाई अहिले जिल्ला प्रहरी परिसर ललितपुरमा राखेर थप अनुसन्धान भइरहेको प्रहरीले जनाएको छ । पक्राउ परेका बजगाई एमाले युवा संघ ललितपुर अध्यक्षसमेत हुन् ।

यसैबीच, गृहमन्त्री गुरुङले बुधबार ती पीडित ज्येष्ठ नागरिकलाई उनकै निवास पुगेर भेटेका छन् । कार्यव्यस्तताका बाबजुद साँझ निवास फर्किने क्रममा मन्त्री गुरुङ ललितपुरस्थित वृद्धको घर पुगेका हुन् ।

भेटका क्रममा गृहमन्त्री गुरुङले भिडियो देखेपछि आफू स्तब्ध भएको र रातभर निदाउन समेत नसकेको बताए । ‘समाजका आदरणीय ज्येष्ठ नागरिकमाथि सडकमै यसरी दुर्व्यवहार हुनु निन्दनीय छ’, उनले भने, ‘त्यसैले मैले तत्कालै एक्सन लिन निर्देशन दिएको हुँ । राज्य सधैँ तपाईंहरूको साथमा छ ।’

आफूमाथि अन्याय हुँदा सरकारले तत्काल तदारुकता देखाएको भन्दै पीडित वृद्धले गृहमन्त्रीलाई धन्यवाद दिएका थिए । उनले दोषीमाथि कानुनी कारबाही हुनेमा आफू विश्वस्त रहेको समेत बताए ।