दाङ- नेकपा (एमाले)का महासचिव एवं दाङ क्षेत्र नम्बर २ का उमेदवार शंकर पोखरेलले साझा जनप्रतिनिधिका रूपमा दाङको विकास र समृद्धिको नेतृत्व गर्ने बताएका छन् ।

आइतबार एमाले दाङ–२ ले घोराहीमा आयोजना गरेको ‘रोड शो’लाई सम्बोधन गर्दै महासचिव पोखरेलले दाङको विकास र समृद्धिको नेतृत्व गर्ने बताएका हुन् । दाङको समृद्धिका लागि संकल्पपत्र तयार पारेर आफू निर्वाचनमा होमिएको भन्दै पोखरेलले पाँच वर्षभित्र गर्ने कामको फेहरिस्त तयार पारेर आफू अगाडि बढेको हुँदा निर्वाचनमा मतदान गरी विजयी बनाउन आग्रह गरे ।

आफू राजनीतिक रूपमा स्थापित भइसकेको उल्लेख गर्दै पोखरेलले अब विकासका लागि साझा जनप्रतिनिधि बन्नुपर्ने आवश्यकता रहेको बताए । दाङ अहिले ऐतिहासिक ‘टर्निङ पोइन्ट’मा उभिएको भन्दै पोखरेलले अबको निर्वाचन विकास र समृद्धिको स्पष्ट दिशातर्फ अघि बढ्ने वा पुनः पछाडि फर्कने बीचको महत्त्वपूर्ण छनोट भएको बताए ।

पोखरेलले आफूले अघिल्लो कार्यकालमा अघि सारेका अधिकांश प्रतिबद्धता पूरा गरेको दाबी गर्दै बाँकी अधुरा योजनाहरू सम्पन्न गर्न पुनः अवसर दिन मतदातासमक्ष आग्रह गरे । उनले दाङलाई लुम्बिनी प्रदेशको राजधानी बनाउने संकल्प सफलतापूर्वक पूरा गरेको बताए ।

संस्थापक मुख्यमन्त्रीका रूपमा संघीयता कार्यान्वयनको नेतृत्व गरेको उल्लेख गर्दै पोखरेलले भने, ‘प्रदेश राजधानीको गुरुयोजना निर्माण, प्रदेशसभा भवन तथा स्थायी पूर्वाधार निर्माण प्रक्रिया अघि बढाएका कारण अहिले देउखुरीमा विकास हुँदै गएको छ ।’

दीर्घकालीन पूर्वाधार विकासलाई प्राथमिकतामा राख्दै घोराही–तुलसीपुर चारलेन सडक समयमै सम्पन्न गर्ने प्रतिबद्धता दोहोर्‍याएका थिए ।