काठमाडौं- इरानका विदेशमन्त्री अब्बास आराघचीले देशले संवैधानिक प्रक्रिया सुरु गरिसकेको बताएका छन् । संक्रमणकालीन परिषद् स्थापना गरिएको, जसले राज्यका मामिलाहरू व्यवस्थापन गर्ने भनी अलजजिरालाई बताएका छन् ।

‘हामीलाई आफ्नो रक्षा गर्नका लागि कुनै प्रतिबन्ध वा सीमा छैन,’ अब्बास आराघचीले भने । इरानी विदेशमन्त्री आराघचीले अलजजिरालाई सर्वोच्च नेताको हत्या अत्यन्त गम्भीर र अभूतपूर्व कार्य भएको तथा यो अन्तर्राष्ट्रिय कानुनको घोर उल्लंघन भएको बताएका छन् ।

सर्वोच्च नेताको हत्याले यो टकराबलाई अझ जटिल र खतरनाक बनाउने उनले बताए । इरानी विदेशमन्त्रीले सबैकुरा व्यवस्थित रहेको र संवैधानिक प्रक्रियाहरू जारी रहेको बताएका छन् ।

अब्बास आराघचीले अलजजिरासँगको अन्तर्वार्तामा अली खामेनीईको हत्यापछिको चयन प्रक्रियाबारे जानकारी दिँदै इरानको संविधानमा स्पष्ट प्रक्रिया तोकिएको र उक्त प्रक्रिया अहिले सुरु गरिएको बताएका छन् ।

उनले आज संक्रमणकालीन परिषद् स्थापना भएको र यसमा राष्ट्रपति, न्यायपालिका प्रमुख तथा गार्डियन काउन्सिलका एक कानुनविद् सम्मिलित रहेको बताए । यो तीन सदस्यीय समूहले नयाँ नेता चयन नभएसम्म नेतृत्वको जिम्मेवारी सम्हाल्ने उनले बताए ।

त्यसपछि ‘विज्ञहरूको सभा’ द्वारा नयाँ नेता चयन गर्ने प्रक्रिया सुरु हुने जानकारी पनि उनले दिए । उनका अनुसार, उक्त प्रक्रिया छोटो समयमै पूरा हुने र एक वा दुई दिनमै देशका लागि नयाँ नेता चयन गरिनेछ ।