काठमाडौँ – नेपाल सरकारले मध्यपूर्वका १२ राष्ट्रमा वैदेशिक रोजगारीमा जानको निम्ति दिँदै आएको श्रम स्वीकृति स्थगन गरेको छ । वैदेशिक रोजगार विभागले एक सूचना जारी गर्दै १२ देशको श्रम स्वीकृति अनिश्चितकालका लागि स्थगन गरिएको जनाएको हो ।

‘मध्यपूर्व तथा खाडी क्षेत्रमा उत्पन्न विषम परिस्थितिलाई मध्यनजर गर्दै मध्यपूर्वका साउदी अरेबिया, युनाइटेड अरब इमिरेट्स, कतार, कुवेत बहराइन, ओमान, इराक, यमन, जोर्डन, लेबनन, टर्की र इजरायल समेतका देशहरूमा वैदेशिक रोजगारीका लागि प्रदान गरिने व्यक्तिगत र संस्थागत श्रम स्वीकृति हाललाई स्थगन गरिएको छ,’ वैदेशिक रोजगार विभागका प्रवक्ता चन्द्रबहादुर शिवाकोटीले बताए । अर्को निर्णय नभएसम्मको लागि श्रम स्वीकृति स्थगन गरिएको उनले जनाए ।

अमेरिका/इजरायल र इरानबीचको युद्ध चर्किएपछि नेपाल सरकारले यस्तो निर्णय लिएको हो । श्रम, रोजगार तथा सामाजिक सुरक्षा मन्त्रालयको मन्त्रिस्तरीय निर्णयबाट १२ देशको श्रम स्वीकृति स्थगन गरिएको हो ।

अमेरिका र इजरायलले शनिबार बिहान अचानक इरानमाथि आक्रमण सुरु गरेका थिए । त्यसपछि इरानले इरानमाथि प्रत्याक्रमण सुरु गरेको थियो । इरानले मध्यपूर्वका यूएई, साउदी अरेबिया, कतार, कुवेत, बहराइन, ओमान, जोर्डन, इराक लगायतका देशमा रहेका अमेरिकी सैन्य वेशहरुमा पनि आक्रमण गरिरहेका छ ।

युद्ध मध्यपूर्वमा फैलिएपछि नेपाल सरकारले ती क्षेत्रमा रहेका १२ देशका लागि दिँदै आएको श्रम स्वीकृति अर्को निर्णय नहुन्जेलसम्मको लागि स्थगित गरेको हो ।

परराष्ट्र मन्त्रालयका अनुसार, मध्यपूर्वमा १७ लाख २९ हजार २८८ नेपाली कार्यरत छन् । इरानमा ६, इजरायलमा करिब ६ हजार ५००, इजिप्टमा ५००, ओमानमा २५ हजार, कतारमा तीन लाख ५७ हजार ९१३, कुवेतमा एक लाख ७५ हजार, बहराइनमा २८ हजार, साउदी अरबमा तीन लाख ८४ हजार ८६५, यूएईमा लगभग सात लाख, लेबनानमा एक हजार ५००, इराकमा ३० हजार र साइप्रसमा १७ हजार नेपाली रहेका छन् ।