काठमाडौंं– स्वास्थ्य तथा जनसंख्यामन्त्री सुधा शर्मा गौतम र माल्दिभ्सका लागि नेपालकी गैर–आवासीय राजदूत एकसाथ अजीमाबीच शिष्टाचार भेटवार्ता भएको छ ।

मन्त्रालयमा सम्पन्न भेटवार्ताको प्रारम्भमा मन्त्री गौतमले राजदूत अजिमालाई माल्दिभ्सको राजदूतमा नियुक्त भएकोमा बधाई दिँदै अनुभवी कूटनीतिज्ञ महत्वपूर्ण जिम्मेवारीमा नियुक्त हुनु सकारात्मक भएको उल्लेख गरिन् । 

सन् १९८० देखि नेपाल र माल्दिभ्स बीच स्थापित कूटनीतिक सम्बन्ध स्मरण गर्दै मन्त्री गौतमले दुई देशबीचको मैत्रीपूर्ण सम्बन्धलाई नेपालले उच्च प्राथमिकतामा राखेको बताइन् । 

उनले राजदूत अजिमाको कार्यकालमा द्विपक्षीय सम्बन्ध अझ सुदृढ हुने विश्वास समेत व्यक्त गरिन् । भेटका क्रममा नेपाल र माल्दिभ्सबीच स्वास्थ्य क्षेत्रको सहकार्य विस्तार, विशेषगरी चिकित्सा शिक्षा, चिकित्सक तथा स्वास्थ्यकर्मीहरूको आदान–प्रदान र स्वास्थ्य सेवामा आपसी योगदानका विषयमा विस्तृत छलफल भएको थियो ।

मन्त्री गौतमले माल्दिभ्समा कार्यरत नेपाली स्वास्थ्यकर्मीमार्फत अघि बढाइएका सहकार्यसम्बन्धी प्रस्तावित मस्यौदाहरू आवश्यक प्रक्रिया पूरा गरी छिट्टै अन्तिम रूप दिनुपर्ने आवश्यकता औँल्याएको मन्त्रालयले जनाएको छ ।

दुई देशबीच स्वास्थ्य सेवा तथा जनशक्ति सहकार्यलाई संस्थागत गर्दै आगामी दिनमा साझेदारी अझ मजबुत बनाउने विषयमा समेत सकारात्मक समझदारी भएको बताइएको छ ।