काठमाडौं- रुसी राष्ट्रपति भ्लादिमिर पुटिनले इरानी सर्वोच्च नेता आयातोल्लाह अली खामेनी मारिएको घटनालाई क्रूर हत्याको संज्ञा दिँदै निन्दा गरेका छन् । रुसी समाचार एजेन्सी तासका अनुसार राष्ट्रपति पुटिनले इरानी समकक्षी मसुद पेजेस्कियानलाई शोक सन्देश पठाउँदै समवेदना व्यक्त गरेका हुन् ।

पुटिनले खामेनीको हत्या मानवीय नैतिकताका सबै मापदण्ड र अन्तर्राष्ट्रिय कानुनको घोर उल्लङ्घन भएको बताएका छन् । उनले खामेनीलाई रुसमा एक प्रतिष्ठित राजनेताका रूपमा स्मरण गरिने बताएका छन् ।

पुटिनले इरान र रुसबीचको मैत्रीपूर्ण सम्बन्धलाई रणनीतिक साझेदारीको उचाइमा पुर्‍याउन उनको ठूलो योगदान रहेको पनि उल्लेख गरेका छन् । इरानमाथि भएको यो आक्रमणले क्षेत्रलाई थप अस्थिरतातिर धकेल्ने भन्दै रुसले चिन्ता व्यक्त गरेको छ।

इजरायल र अमेरिकाले संयुक्त रुपमा गरेको हमलाका क्रममा इरानका सर्वोच्च नेता आयातोल्लाह अली खामेनीको मृत्यु भएको हो । यससँगै इरानमा नयाँ सर्वोच्च नेता चयनको प्रक्रिया अघि बढाइएको अन्तर्राष्ट्रिय सञ्चार माध्यमले जनाएका छन् ।