तेहरान- इजराइलको वायु सेनाले अमेरिकासँग संयुक्त आक्रमण अन्तर्गत पछिल्लो २४ घण्टामा इरानमाथि १२०० भन्दा बढी बम खसालेको जनाएको छ।

आक्रमण परेका स्थानमध्ये दक्षिणी इरानको होर्मोजगान प्रान्तस्थित मीनाब शहरको एक प्राथमिक विद्यालय पनि रहेको बताइएको छ।

महिला विद्यार्थी मात्रै पढ्ने विद्यालयमा गरिएको उक्त हमलामा १४८ छात्राको ज्यान गएको छ। त्यहाँ दर्जनौँ अन्य घाइते भएका छ्न्।

इरानका विदेशमन्त्री अब्बास अरघाचीले विद्यालयमाथि बम आक्रमण गरेर निर्दोष बालबालिकाको हत्या गरिएको भन्दै यसको जवाफ अवश्य दिइने चेतावनी दिएका छन्।

यसबीच इजराइली सेनाले इरानमाथि नयाँ श्रृंखलाको हवाई आक्रमण जारी रहेको जनाएको छ। ती आक्रमणमा इरानका ब्यालिस्टिक मिसाइल प्रणाली र हवाई प्रतिरक्षा संयन्त्रलाई निशाना बनाइएको दाबी गरिएको छ।

इरानको सरकारी सञ्चारमाध्यमले तेहरानमा विस्फोट भएको खबर दिएको छ।

इरानमाथिको आक्रमणबाट इजराइललाई बढी फाइदा भएको, अमेरिकालाई कम लाभ पुगेको भन्दै अल जजीराले विज्ञहरूलाई उद्धृत गरेको छ।

गत मे महिनामा मध्यपूर्व भ्रमणका क्रममा अमेरिकी राष्ट्रपति डोनाल्ड ट्रम्पले अमेरिका अब अन्य देशको सरकार परिवर्तन गर्ने प्रयासमा नलाग्ने बताएका थिए।

तर त्यसको केही समयपछि नै उनले इरानमाथि ठूलो आक्रमण गर्न आदेश दिएका थिए। उनले उक्त कदमको उद्देश्य इरानमा स्वतन्त्रता ल्याउनु रहेको बताएका छन्।