काठमाडौं– बलिउडका चर्चित निर्देशक रोहित शेट्टीको मुम्बईस्थित जुहूको घर ‘शेट्टी टावर’ बाहिर फायरिङ भएपछि फिल्म उद्योगमा सनसनी फैलिएको छ ।

जानकारी अनुसार बिहान सबेरै दुई जना बाइकमा आएका हमलावरले घरबाहिर ३–४ राउन्ड गोली प्रहार गरी फरार भएका थिए । यस घटनामा कोही पनि घाइते भएका छैनन् ।

भारतीय मिडिया अनुसार, सुरुमा कसैले जिम्मेवारी नलिए पनि केही घण्टापछि ग्याङस्टार लरेन्स बिश्नोईको गिरोहले यस फायरिङको जिम्मेवारी लिएको दाबी गरेको छ । 

सामाजिक सञ्जालमा भाइरल भएको पोस्टमा बिश्नोई गिरोहका सदस्य शुभम लोंकर र आरजू बिश्नोईको नाम उल्लेख गर्दै रोहित शेट्टीलाई चेतावनी दिइएको छ । 

पोस्टमा ‘हाम्रो काममा दखल नदिनु’ भन्दै नमानिए थप गम्भीर परिणाम भोग्नुपर्ने धम्कीसमेत दिइएको छ। साथै सम्पूर्ण बलिउड उद्योगलाई पनि चेतावनी दिइएको छ।

पोस्ट भाइरल भएपछि मुम्बई प्रहरी र क्राइम ब्रान्च सतर्क बनेका छन् । घटनास्थलमा फरेन्सिक टोली पुगेर अनुसन्धान गरिरहेको छ भने वरपरका सिसिटिभी फुटेजहरू जाँच भइरहेका छन् । 

यस घटनाले फिल्म उद्योगमा सुरक्षा चिन्ता थप गहिरिएको छ।