काठमाडौं– राष्ट्रिय बाल अधिकार परिषद्ले भोटेकोशी–त्रिशूली बाढीबाट प्रभावित बालबालिकालाई सम्बन्धित निकायको अनुमति बिना संस्थागत संरक्षणमा नराख्न र ओसारपसार नगर्न आग्रह गरेको छ।

परिषद्ले बाबुआमा वा संरक्षक गुमाएका, बेपत्ता भएका वा घाइते बालबालिकालाई पहिले परिवारका सदस्य तथा नातेदारकै संरक्षणमा राखी राहत, उपचार र मनोपरामर्शलगायत सहयोग उपलब्ध गराउन आग्रह गरेको छ ।

स्थानीय तहमा संरक्षणको व्यवस्था सम्भव नभए मात्र स्थानीय बाल अधिकार समितिको निर्णय, बाल कल्याण अधिकारीको सिफारिस र राष्ट्रिय बाल अधिकार परिषद्को सहमतिमा सूचीकृत बालगृह वा संस्थामा अस्थायी संरक्षणको व्यवस्था गरिने परिषद्ले जनाएको छ ।

परिषद्ले बालबालिकाको सर्वोत्तम हित र प्रचलित बाल संरक्षणसम्बन्धी कानुनविपरीत हुने गतिविधि नगर्न सबै सरोकारवालालाई आग्रह गरेको छ ।