काठमाडौँ– प्रधानमन्त्री सुशीला कार्कीले झापामा पुराना नेता र दलको अवस्था कमजोर भएको टिप्पणी गरेकी छन्।

शुक्रबार साँझ सम्पादकहरुसँगको छलफलमा कार्कीले भदौ २३ र २४ को जेनजी आन्दोलनपछि झापामा पुराना नेता र दलको अवस्था झनै कमजोर हुँदा दुर्गा प्रसाईँहरु भने बलियो भइरहेको बताएकी हुन्।

केपी ओलीप्रति ईंगित गर्दै उनले भनिन्, ‘पुराना नेताको शक्ति घटिसक्यो। आन्दोलन गर्छु भन्दै हिँडेका छन्, दुर्गाजी। अराजक कुरा गर्न पाइँदैन। तर आफ्नै ठूलो समूह लिएर हिँडेका छन्। भव्य समूह छ उनको भन्ने सुन्दैछु। समर्थकहरू पनि तयार भएका देखिन्छन्। झापामा यति बेला पुराना नेताहरूको शक्तिमा ह्रास आएको छ। उनले चुनाव जित्न पनि सक्छन्।’
कार्कीले प्रसाईँलाई दल खोलेर चुनावमा जान पनि सुझाव दिइन्।