काठमाडौं – नेकपा एकीकृत समाजवादीका सम्मानित नेता झलनाथ खनाल र महासचिव घनश्याम भुसाल लगायतका नेताले छुट्टै भेला गर्ने भएका छन् । पार्टी अध्यक्ष माधव नेपाल लगायतका नेताहरु माओवादी केन्द्रसँगको एकताका लागि अघि बढेपछि झलनाथ खनाल पक्ष शनिबार दिउँसो एक बजे छुट्टै बैठक गर्ने भएको हो ।

सम्मानित नेता खनालका अनुसार कुनै पनि हालतमा उनीहरू माओवादीसँगको एकताको पक्षमा छैनन्। ‘बोल्न नदिकन नै एकल निर्णय गरिएको छ। मैले ३० बुँदा लामो फरक मत प्रस्तुत गर्न खोजेको थिएँ त्यो पनि पाइन,’ खनालले खबरहरूलाई भने, ‘भोलि १ बजेपछि साथीहरूसँग बैठक गरेर थप कुरा के गर्ने भन्ने निर्णय गर्नेछौं । हामी यही पार्टी अगाडि बढाएर जान पनि सक्छौं र नयाँ पार्टी बनाउन पनि सक्छौँ। तर माओवादीसँग मिल्ने कुरा अहिले ठिक छैन।’

नेकपा एकीकृत समाजवादीको तीन दिन लामो बसेको केन्द्रीय कमिटी बैठकले माओवादीसँग एकता गर्ने विषयमा अध्यक्षले प्रस्तुत गरेको प्रतिवेदन पारित गरेको छ। तर यसको सम्पूर्ण जिम्मेवारी सचिवालयलाई दिइने भन्दै बैठक टुङ्गिएको छ।

त्यसपछि सम्मानित नेता खनाल महासचिव घनश्याम भुसाल, वरिष्ठ नेता घनेन्द्र बस्नेत, स्थायी कमिटी सदस्य रामकुमारी झाँक्री विजय पौडेल जीवराम श्रेष्ठ लगायतका नेताहरु एकताको विपक्षमा छन् ।

यस्तै पोलिट ब्युरो सदस्य अशोक घिमिरे दामोदर अर्याल लक्ष्मण लम्साल, शिव भण्डारी,अब्दुल हुसेन, महेश रेग्मी र धर्म निरौला एकताको विपक्षमा छन् ।

यता केन्द्रीय सदस्य आरती लामा पनि माओवादीसँग एकता गर्नु नहुने पक्षमा छिन्। भोलिको भेलामा को को नेताहरू उपस्थित हुन्छन् त्यो भने हेर्न बाँकी छ।