काठमाडौं– सुदूरपश्चिम प्रदेशमा विशेष रुपमा मनाइने गौरापर्व काठमाडौंको टुँडिखेलमा पनि मनाइएको छ ।

हरेक वर्षजस्तै सुदूरपश्चिममबाट काठमाडौं आएर बसोबास गर्ने समुदायहरू काठमाडौंको टुँडिखेलमा भेला भएर सद्भाव र एकताको सन्देश दिने गौरा पर्व मनाएका हुन् । 

मौलिक पर्वका रूपमा मनाइने धार्मिक तथा सांस्कृतिक महत्त्व बोकेको गौरापर्व सुरुसुरुमा सुदूरपश्चिममा मात्र मनाइने भए पनि पछिल्लो समय काठमाडौंमासमेत विशेष रूपमा मनाउन थालिएको हो । 

परापूर्व कालदेखि मनाउँदै आएको गौरापर्व सुदूरपश्चिम प्रदेशको विशिष्ट पहिचानका रूपमा परिचित छ । गौरा पर्वको ऐतिहासिक एवं पौराणिक महत्त्व बोकेको छ । गौरा पूजनका हिसाबले यस दिन महिलाहरूले महत्त्वपूर्ण मान्दछन् । 

महिलाहरूले बिहानै खोला तलाउमा स्नान गरी घाँसबाट निर्मित गौरा देवीको प्रतिमा र काठको महेश्वरको प्रतिमालाई गौरा घरबाट बाहिर आँगनमा ल्याई शृङ्गार गरी सगुन गीत गाउँदै टाउकोमा राखेर नाच्ने गर्दछन् । आठ अध्यायमा महेश्वर र गौरा गीतलाई महिलाले गाउने हुनाले यसलाई अठेवाली पनि भन्ने गरिन्छ ।

हिमालयकी छोरी पार्वतीले भगवान् शिवलाई पति पाउन गौरा देवीको निराहार व्रत बसेको किंवदन्तीका आधारमा गौरा मनाउने गरिएको कथन रहेको छ ।