काठमाडौं– पाकिस्तानमा फेरि पोलियो रोगका बिरामी भेटिएका छन् । यस वर्षमात्रै पाकिस्तानमा पोलियोका १७ जना बिरामी फेला परिसकेका छन् ।

यसअघि गत जनवरी महिनामा मुलुकको खैबर पख्तुनख्वा प्रान्तमा पोलियोका बिरामी भेटिएका थिए । त्यसयताको आठ महिनामा पाकिस्तानका विभिन्न स्थानमा पोलियोका १७ जना बिरामी फेला परेको पाकिस्तानबाट प्रकाशित हुने द एक्सप्रेस ट्रिब्युनको अनलाइन संस्करणले जनाएको छ ।

पोलियो रोगको फैलावट रोक्नका लागि पाकिस्तानले यसै वर्षको शुरुदेखि खोप अभियान सञ्चालन गरेको छ । हालसम्म पाकिस्तानले ४ करोड ५० लाख बालबालिकालाई खोप दिइसकेको ट्रिब्युनले उल्लेख गरेको छ ।

पाकिस्तानका विभिन्न समुदायले पोलियो खोप अभियानको विरोध गर्दै आएका छन् । यस कारण त्यहाँ अझै पनि पोलियो उन्मूलन हुन नसकेको बताइन्छ ।