काठमाडौं– मालदिभ्सका पूर्वराष्ट्रपति मोहम्मद नसिदले भारतीय प्रधानमन्त्री नरेन्द्र मोदीको भ्रमणले आफ्नो मुलुकमा पर्यटकको सङ्ख्या बढ्ने बताएका छन् । उनले दुई मुलुकबीचको सम्बन्ध बलियो हुँदा सबैलाई लाभ मिल्ने पनि उल्लेख गरे ।

भारतीय समाचार संस्था एएनआईसँगको कुराकानीका क्रममा पूर्वराष्ट्रपति नसिदले मोदीको मालदिभ्स भ्रमणबाट भारतीय पर्यटकको सङ्ख्यामा उल्लेख्य वृद्धि हुने अपेक्षा गरे । उनले भारतीय आर्थिक सहायतामा निर्माण भइरहेको हनिमाडु विमानस्थल चाँडै सम्पन्न हुने पनि विश्वास व्यक्त गरे ।

यस विमानस्थलको निर्माणकार्य पूरा भएको खण्डमा दक्षिण भारत र उत्तरी मालदिभ्सबीचको हवाई सम्पर्क सहज हुने जनाइएको छ । समस्याग्रस्त अवस्थामा रहेको मालदिभ्सको अर्थतन्त्रलाई भारतले ठूलो सहायता प्रदान गरेको पनि उनले उल्लेख गरे ।

मालदिभ्सको ६० औँ स्वतन्त्रता दिवसका अवसरमा प्रधानमन्त्री मोदी मालदिभ्स पुगेका हुन् । मालदिभ्समा मोदीलाई भव्य स्वागत गरिएको थियो ।