काठमाडौं- नागरिक उन्मुक्ति पार्टी (नाउपा)का संरक्षक रेशमलाल चौधरीले नेपाली कांग्रेसका सभापति शेरबहादुर देउवासँग भेटघाट गरेका छन् ।

पार्टीमा आन्तरिक विवाद चर्किरहेका बेला उनले बिहीबार बूढानीलकण्ठ गएर कांग्रेस सभापति देउवासँग भेटघाट गरेका हुन् ।

चौधरीले सभापति देउवासँगको तस्बिर सामाजिक सञ्जाल फेसबुकमा साझा गरेका छन् । उनले लेखेका छन्, ‘ राजनैतिक महत्वपूर्ण छलफल ।’

रेशमले बुधबार मात्रै प्रथम राष्ट्रिय भेलामार्फत् अध्यक्ष एवम् पत्नी रञ्जिता श्रेष्ठलाई साधारण सदस्यसमेत नरहने गरी पार्टीबाट निकाल्ने निर्णय गरेका थिए ।

नागरिक उन्मुक्तिले यसअघि नै सुदूरपश्चिम प्रदेश सरकार छाडिसकेको छ । सुदूरपश्चिमका मुख्यमन्त्री कमल शाह विश्वासको मत परीक्षण तयारीमा रहेका बेला रेशमले कांग्रेस सभापतिलाई भेटेका हुन् ।

मुख्यमन्त्री शाहले बिहीबार अपराह्न प्रदेशसभामा विश्वासको मत लिने तयारी गरिरहेका छन् ।