काठमाडौं- सात दलीय गठबन्धन सरकार बनेको एक वर्षपछि प्रधानमन्त्री केपी शर्मा ओलीले मन्त्रिपरिषद् पुनर्गठन तयारी गरेका छन् ।

उनले मन्त्रिपरिषद्मा फेरबदलका लागि अहिले नेपाली कांग्रेसका सभापति शेरबहादुर देउवासँग बालुवाटारमा संवाद गरिरहेका छन् ।

गठबन्धन दलका सबै मन्त्रीहरू हेरफेर गर्ने गरि ओलीले कांग्रेससहितका दलसँग संवाद थालेका हुन् । बालुवाटारमा जारी छलफलमा कांग्रेसबाट सभापति देउवा, उपसभापति पूर्णबहादुर खड्का र गृहमन्त्री रमेश लेखक सहभागी छन् ।

एमालेबाट प्रधानमन्त्री ओलीसहित उपप्रधानमन्त्री तथा अर्थमन्त्री विष्णुप्रसाद पौडेल र उपमहासचिव विष्णु रिमालल सहभागी छन् । महान्ययाधिवक्ता रमेश बडाल पनि बैठकमा सहभागी छन् ।

तर विवाद हुने डरले कांग्रेसले मन्त्री हेरफेरका लागि आफूलाई तयार बनाइनसकेको स्रोतले जनाएको छ । यता एमालेले विवादमा मुछिएकासहित आधाजसो मन्त्री फेर्ने तयारी गरिरहेको छ।

सात दलीय गठबन्धनका लोकतान्त्रिक समाजवादी पार्टी र जनता समाजवादी पार्टीले पनि मन्त्रीहरू फेर्ने तयारी अघि बढाएका छ्न्। अशोक राई नेतृत्वको जसपाबाट अहिले प्रदीप यादव खानेपानी मन्त्री र नवलकिशोर साह सुडी महिला बालबालिका तथा ज्येष्ठ नागरिकको भूमिकामा छन् । उता महन्थ ठाकुर नेतृत्वको लोसपाबाट शरतसिंह भण्डारी श्रममन्त्री छन् । उनी २२ औँ पटक मन्त्री पदमा आशिन भएका नेता हुन् ।

स्रोतका अनुसार अशोक राई नेतृत्वको जसपाले खानेपानी मन्त्री यादवलाई फिर्ता बोलाएर प्रतिनिधिसभाका प्रमुख सचेतक डा. वीरेन्द्रप्रसाद महतो र महिला मन्त्री सुडीको स्थानमा रञ्जु झालाई पठाउने तयारी गरेको छ ।

उता लोसपाबाट अध्यक्ष ठाकुरले भण्डारीलाई फिर्ता गरेर सर्वेन्द्रनाथ शुक्ललाई मन्त्री बनाउने तयारी गरेका छन् । यसबारेमा उनले प्रधानमन्त्री ओलीसँग संवाद पनि गरिसकेको उनको सचिवालयले जनाएको छ। अध्यक्ष ठाकुरले शुक्लको नामसहितको पत्र बालुवाटार पठाउने तयारी गरेको सचिवालयका एक सदस्यले जानकारी दिए ।

उता कांग्रेसबाट पनि केही मन्त्री हेरफेरको कोसिस भइरहेको छ। स्रोतका अनुसार यसअघि नै कांग्रेसबाट परराष्ट्रमन्त्री डा. आरजु देउवा र गृहमन्त्री रमेश लेखकलाई कायमै राखेर अन्यलाई फिर्ता बोलाउने गरि छलफल भएको थियो ।

तर कांग्रेसमा नेता शेखर कोइरालासँग सभापति देउवाको कलह बढिरहेको अवस्थामा मन्त्री हेरफेरले झन् विवाद बढ्ने डर बूढानीलकण्ठलाई छ । त्यहीकारण कांग्रेस मन्त्री हेरफेरको निर्णयमा पुगिसकेको छैन।