काठमाडौं- प्रधानमन्त्री केपी शर्मा ओलीले गत शुक्रबार काठमाडौंको भृकुटीमण्डपमा नेकपा माओवादी केन्द्र नेतृत्वको समाजवादी मोर्चाले गरेको सभाप्रति खुसी व्यक्त गरेका छन् ।

उक्त सभा भव्य भएको बताउँदै उनले सभाबाट संविधान र व्यवस्थाप्रति प्रतिबद्धता जनाइएको भन्दै आयोजकलाई ओलीले धन्यवाद दिएका छन् ।

त्यही दिन काठमाडौंको तीनकुनेमा आयोजित प्रदर्शनको आयोजक को थियो भन्ने थाहा पाउन द्विविधा रहेको बताएका छन् ।

सोमबार बसेको प्रतिनिधिसभाको बैठकमा प्रधानमन्त्री ओलीले तीनकुनेमा सभा गर्ने भनेकाहरूले सभा नभई उत्तेजक प्रदर्शन र अराजनीतिक गतिविधि देखाएको पनि बताए ।

‘यस सम्मानित सदनमा राम्रो उपस्थिति रहेका दलहरूको मूल नेतृत्वमा समाजवादी मोर्चाले काठमाडौंको प्रदर्शनी मार्गमा भव्य सभा गर्‍यो । आफ्नो धारणा सार्वजनिक गर्‍यो’, उनले भने, ‘सरकारलाई खबरदारी गर्‍यो । संविधान र व्यवस्थाप्रति आफ्नो प्रतिवद्धता जनायो । शालिन जुलुससहित भएको त्यस कार्यक्रमका आयोजकहरूलाई धन्यवाद ज्ञापन गर्दछु ।’