काठमाडौं– राष्ट्रिय स्वतन्त्र पार्टी संसदीय दलका उपनेता विजभक्त श्रेष्ठले आकस्मिक समय माग गरी बोल्न पाउने अधिकारबाट बञ्चित गरिएको दाबी गरेका छन् । 

उनले शुक्रबार प्रतिनिधि सभा बैठकमा आकस्मिक समयको माग गर्दा सभामुख देवराज घिमिरेले बोल्न नदिएकोप्रति गुनासो व्यक्त गरे । 

उनले संसद्‍मा बोल्न नदिँदा टेबल ठोकेर समर्थन गर्ने हातहरू भोलि प्रयागराजको महाकुम्भमा गएर धोए पनि चोखो नहुने बताए । 

सामाजिक सञ्जालमार्फत् लेख्दै श्रेष्ठले संवैधानिक अधिकार हनन् भएको आरोप समेत लगाए । उता सभामुख घिमिरेले भने कार्यव्यवस्था परामर्श समितिको बैठकमै आज आकस्मिक समय नराख्ने सहमति भएकाले दिन नसकिने उल्लेख गरेका थिए ।

यसो भने

‘संसद् नियमावली अन्तर्गत नै रहेको आकस्मिक समयको माग गरी बोल्न पाउने अधिकारबाट पनि हामीलाई वञ्चित गरियो। हाम्रो संवैधानिक अधिकार हनन गरियो। आज संसद्मा हामीलाई बोल्न नदिँदा टेबल ठोकेर समर्थन गर्ने हातहरू प्रयागराजको महाकुम्भमा गएर धोए पनि चोखो हुनेवाला छैन।’