काठमाडौं- संघीय संसद्को हिउँदे अधिवेशनको पहिलो बैठक शुक्रबार दिउँसो सुरु भएको छ।

पहिलो बैठक सुरु भएर सभामुख देवराज घिमिरेले राष्ट्रपतिको कार्यालयले पठाएका पत्र पढेर कार्यसूचीमा प्रवेश गर्नेबित्तिकै राष्ट्रिय स्वतन्त्र पार्टीका सांसदहरूले उठेर विरोध जनाएका छन् ।

विरोध जनाउनेमा रास्वपाका सांसद छन् । उनीहरूले सरकारले ल्याएका ६ वटा अध्यादेश फिर्ता र सभापति रवि लामिछानेको निलम्बन फुकुवा गर्नुपर्ने माग गरेका छन् ।

यो बैठकमा प्रधानमन्त्री केपी शर्मा ओली, सत्ता साझेदार नेपाली कांग्रेसका सभापति शेरबहादुर देउवासहितका शीर्ष नेताहरू सहभागी छन् ।

लामो समयपछि चलेको यो बैठकमा सहभागी हुन सांसदहरू उत्साहित भएर पुगेका थिए । तर रास्वपाको अवरोधपछि अवस्था केही तनाव भएको छ। बैठकमा रास्वपाको अवरोधबीच सभामुखले कार्यसूची अघि बढाएका छन् ।

तस्बिरहरू : नेपाल फोटो लाइब्रेरी