काठमाडौं– सत्ता साझेदार नेपाली कांग्रेसमा स्थानीय तहको निर्वाचन अगावै संघीय निर्वाचन गर्नुपर्ने माग उठेको छ ।

कांग्रेस संसदीय दलको बैठकमा ०८४ मा हुने संघीय निर्वाचन स्थानीय तह निर्वाचन अगावै गर्नुपर्ने माग उठेको हो ।

नयाँ बानेश्वरस्थित संघीय संसद् भवनमा शुक्रबार बसेको दलको बैठकमा केही सांसदहरूले यस्तो प्रस्ताव गरेको एक सांसदले जानकारी दिए ।

उनका अनुसार सांसदहरू ईश्वरी न्यौपाने, उदय शमशेर राणा, देवनारायण तिमिल्सिनालगायतले स्थानीय निर्वाचन अघि नै संघीय निर्वाचन गर्नुपर्ने प्रस्ताव गरेका हुन् ।

शुक्रबार बसेको बैठकमा बोल्ने क्रम जारी रहेपछि माघ २४ गतेका लागि अर्को बैठक बोलाइएको छ ।

‘आज सक्ने गरेर हामीले बोलाएका थियौँ । तर, बोल्ने वक्ता बाँकी भएर बैठक सिध्याउन सकेनौँ,’ बैठकपछि कांग्रेसका प्रमुख सचेतक श्यामकुमार घिमिरेले भने, ‘अब २४ गते बिहान साढे ८ बजेदेखि पुन बैठक बस्ने छ ।’

घिमिरेका अनुसार दलको बैठकमा कांग्रेसका सांसदहरूले बोल्ने क्रम सकिएको छ । आगामी बैठकमा पार्टीका तर्फबाट सरकारमा सहभागी मन्त्रीहरू र पार्टी पदाधिकारी र दलका नेतासमेत रहेका सभापति शेरबहादुर देउवाले बोल्ने कार्यसूची छ ।

‘सांसदहरूको बोल्ने क्रम सकिएको छ । अब मन्त्रीहरू, पदाधिकारीहरू र नेताले बोल्ने क्रम बाँकी छ,’ घिमिरेले भने ।