काठमाडौं- नेपाली कांग्रेस संसदीय दलको अर्को बैठक माघ २४ गते बस्ने भएको छ ।

नयाँ बानेश्वरस्थित संघीय संसद् भवनको ल्होत्से हलमा शुक्रबार बसेको बैठकमा बोल्ने क्रम जारी रहेपछि माघ २४ गतेका लागि अर्को बैठक बोलाइएको हो ।

‘आज सक्ने गरेर हामीले बोलाएका थियौँ । तर, बोल्ने वक्ता बाँकी भएर बैठक सिध्याउन सकेनौँ,’ बैठकपछि कांग्रेसका प्रमुख सचेतक श्यामकुमार घिमिरेले भने, ‘अब २४ गते बिहान साढे ८ बजेदेखि फेरि बैठक बस्ने छ ।’

घिमिरेका अनुसार दलको बैठकमा कांग्रेसका सांसदहरूले बोल्ने क्रम सकिएको छ । आगामी बैठकमा पार्टीका तर्फबाट सरकारमा सहभागी मन्त्रीहरू र पार्टी पदाधिकारी र दलका नेतासमेत रहेका सभापति शेरबहादुर देउवाले बोल्ने कार्यसूची छ ।

‘सांसदहरूको बोल्ने क्रम सकिएको छ । अब मन्त्रीहरू, पदाधिकारीहरू र नेताले बोल्ने क्रम बाँकी छ,’ घिमिरेले भने । कांग्रेस संसदीय दलको बैठक गत माघ १३ गतेदेखि निरन्तर बसिरहेको छ ।