काठमाडौं – राष्ट्रिय स्वतन्त्र पार्टी (रास्वपा)का समानुपातिक उम्मेदवार डा. रामजी रामले पार्टीले सार्वजनिक गरेको समानुपातिक बन्दसूचीप्रति असन्तुष्टि जनाएका छन्। सामाजिक सञ्जाल फेसबुकमार्फत धारणा सार्वजनिक गर्दै उनले आन्तरिक प्राइमरी इलेक्सनको औचित्य र प्रक्रियामाथि गम्भीर प्रश्न उठाएका हुन्।

उनले लोकतन्त्रमा मतदाताको मतको अर्थ र सम्मान हुनुपर्ने उल्लेख गर्दै प्राइमरी इलेक्सनमार्फत अग्रस्थान हासिल गरेका व्यक्तिहरूलाई मतअनुसारको स्थान नदिइएको देखिएको बताएका छन्। विशेषगरी दलित समुदायबाट सर्वाधिक मत ल्याएका विजय जैरुको नाम समानुपातिक सूचीमै नपरेकोप्रति उनले आपत्ति जनाएका छन्।

उनले पार्टीले प्राइमरी इलेक्सनलाई उम्मेदवार छनोटको आधार मानेको हो वा होइन भन्ने विषयमा स्पष्ट जवाफ मागेका छन्। यदि रास्वपामा विधि र सुशासनको अर्थ रहन्छ भने विजय जैरुलाई सम्मानसहित उचित स्थानमा राख्नुपर्ने उनको माग छ।

डा. रामजी रामले आफ्नो नाम सूचीमा हुनु र विजय जैरुजीको नाम सूचीमै नहुनुले आफूलाई लज्जाबोध भएको समेत उल्लेख गरेका छन्। यदि आफूलाई सूचीमा राखिएकै कारण विजय जैरु अटाउन नसकेको अवस्था हो भने आफू फरक भूमिकामा रहेर पनि देश र पार्टीका लागि न्याय र सुशासनको खबरदारी गर्न तयार रहेको उनको भनाइ छ।

पार्टीभित्रको लोकतान्त्रिक अभ्यासले मात्र साँचो अर्थमा पार्टीलाई बलियो बनाउने उल्लेख गर्दै उनले नेतृत्वलाई समीक्षा गर्न आग्रह गरेका छन्।