काठमाडौं- नेपाली कांग्रेसका महामन्त्री गगनकुमार थापाले पार्टी नेता अर्जुननरसिंह केसीलाई आफ्नो प्रयासमा समानुपातिक सूचीमा राखिएको भन्ने हल्ला असत्य भएको स्पष्ट पारेका छन्।

उनले पार्टी नेता तथा आफ्ना ससुराबारेको उक्त निर्णय आफ्नो चाहना, अनुरोध र सम्भव प्रयास विपरीत भएको पनि बताएका छन्।

सामाजिक सञ्जालमार्फत स्पष्टिकरण दिँदै थापाले उक्त निर्णय आफ्नो चाहना, अनुरोध र सम्भव प्रयास विपरीत भएको बताएका हुन्।

‘नेपाली कांग्रेसका नेता अर्जुननरसिंह केसीलाई मेरो प्रयासमा समानुपातिक सूचीमा राखिएको भन्ने हल्ला फैलाइएको रहेछ। म स्पष्ट पार्न चाहन्छु, यो मेरो चाहनाविपरीत हो,’ थापाले लेखेका छन्। उनले यस विषयमा आफूले अनुरोध गरेको र सम्भव सबै प्रयास गरे पनि फरक निर्णय भएको उल्लेख गरेका छन्।

थापाले आफू र केसीबीच राजनीतिक दृष्टिकोण र निर्णयहरू कहिले मिल्ने र कहिले फरक पर्ने स्वाभाविक प्रक्रिया भएको बताएका छन्। ‘मेरो र उहाँको आ-आफ्ना राजनीतिक दृष्टिकोण र निर्णयहरू हुन्छन्। कहिले मिल्छन्, कहिले बाझिन्छन्,’ उनले भनेका छन्।

उनले विगतमा पनि राजनीतिक प्राथमिकता नमिल्दा पार्टीको महामन्त्री पदका लागि फरक एजेन्डा र सङ्कल्पसहित चुनाव लडेको स्मरण गराएका छन्।
यसपटक पनि अग्रज नेताले समानुपातिक प्रणाली रोज्ने वा नरोज्ने विषयमा मतभिन्नता रहेको थापाको भनाइ छ।

थापाको स्पष्टीकरणपछि समानुपातिक सूचीमा परिवारिक प्रभावका आधारमा निर्णय भएको भन्ने आरोपप्रति थप बहस सुरु भएको छ।