काठमाडौं– राष्ट्रिय स्वतन्त्र पार्टी र विवेकशील साझा पार्टी आइतबार औपचारिक रूपमा एकीकृत भएका छन् । दुवै पार्टीले सामाजिक न्याय, उदार अर्थतन्त्र र सुशासनमा आधारित वैकल्पिक राजनीतिलाई संस्थागत रूपमा अघि बढाउन सहमति जनाउँदै एकीकरण घोषणा गरेका हुन् ।

छोटो अवधिमै प्रभावशाली संसदीय उपस्थिति बनाएको रास्वपाले सुशासनका प्रश्नमा देखाएको हस्तक्षेप र स्व. उज्ज्वल थापाद्वारा सुरू गरिएको विवेकशील अभियानको दीर्घकालीन योगदानलाई एउटै धारमा ल्याउन दुवै पक्षले एकीकरणलाई आवश्यक ठहरेका हुन् ।

सहमतिको मुख्य बुँदा:

– रास्वपाको सिद्धान्त र नेतृत्व संरचना यथावत् रहनेछ। विवेकशील अभियानको योगदानलाई आधिकारिक रूपमा अभिलेखीकरण गरिनेछ।

– रास्वपाले बनाएको विशेष संयन्त्र संघीय नेतृत्व मञ्चमा विवेकशील साझा हुँदै आएका नेताहरूलाई आपसी सहमतिमा समावेश गरिनेछ।

– विवेकशील साझा पार्टीका सदस्य र सल्लाहकारलाई केन्द्रीयदेखि स्थानीय तहसम्म योग्यता र समावेशिताको आधारमा जिम्मेवारी बाँडफाँड हुनेछ।

– एकीकरणपछि दलको नाम राष्ट्रिय स्वतन्त्र पार्टी नै रहनेछ। झण्डा र चुनाव चिन्ह पनि यथावत् रहनेछ।

– निर्वाचन आयोगमा आवश्यक कानुनी प्रक्रिया दुवै पार्टीले संयुक्त रूपमा पूरा गर्नेछन्। दुवै पार्टीका सम्पत्ति र संरचनाको व्यवस्थापन पनि आपसी सहमतिमा अघि बढाइनेछ।

– सुशासन र समुन्नतिको एजेन्डामा गोलबद्ध हुँदै अन्य वैकल्पिक राजनीतिक शक्ति र व्यक्तिलाई सहकार्यका लागि आह्वान गरिएको छ।

एकीकरणपत्रमा विवेकशील साझा पार्टीका अध्यक्ष समीक्षा वाँस्कोटा, उपाध्यक्ष प्रकाशचन्द्र परियार र रास्वपाका कार्यवाहक सभापति डोलप्रसाद अर्याल, उपसभापति डा. स्वर्णिम वाग्ले लगायतका नेतृत्वले हस्ताक्षर गरेका छन्।