काठमाडौं- गत भदौ २४ गते डल्लुस्थित घरमा आगो लगाइदिँदा जलेर गम्भीर घाइते भएकी पूर्वप्रधानमन्त्री झलनाथ खनालकी पत्नी रविलक्ष्मी चित्रकारको यतिबेला भारतको दिल्लीमा उपचार जारी छ ।

शरीरको करिब ५५ प्रतिशत भाग जलेर कीर्तिपुर बर्न अस्पताल लगिएकी उनलाई त्यहाँ केही दिन उपचार गरेर अहिले दिल्लीमा थप उपचार भइरहेको छ । तर उनको एउटा हात कीर्तिपुरमै काटिएको छ।

त्रिभुवन विश्वविद्यालयकी प्राध्यापक रहेकी श्रीमती चित्रकारलाई जेन-जीका नाममा जिउँदै जलाउनेहरूप्रति एकीकृत समाजवादीका सम्मानित नेता खनालको रिस अझै मरेको छैन ।

काठमाडौंमा दुई दिनदेखि जारी केन्द्रीय कमिटीको तेस्रो पूर्ण बैठकलाई सम्बोधनका क्रममा खनालले श्रीमतीलाई जिउँदै आगो लगाउने समूहलाई ‘जल्लाद’ को संज्ञा दिएका छन् ।

‘त्यस दिन हामी तीनैजनालाई जलाउने र मार्ने ढंगले तिनीहरू आएका रहेछन् । दुई मिनेटले मैले श्रीमतीलाई जोगाउन सकिनँ’, उनले भने, ‘दुई मिनेटले नै मलाई मिल्ट्रीले तानेर लग्यो । नत्र हामी तीनैजना एकै ठाउँ हुने रहेनछौँ ।’

उनले यदि सेनाले नलगेको भए आफू पनि मर्ने ती जलाउन आउनेलाई पनि मार्ने भन्दै उनले आक्रोश पोखे । ‘ती जल्लादहरूले हामीलाई जलाउनै आएकाले एकदुई जनालाई मैले पनि चिथोरेर मार्थेँ । हामीलाई जलाउने स्थिति आएको भए म पनि उनीहरूलाई बाँकी राख्दिनथेँ’, उनले भने, ‘तर मलाई मिल्ट्रीले तानेर लग्यो । त्यहाँ बसेर भिडेको भए राम्रै घटना हुन्थ्यो । तिनीहरूसँग म डराउनेवाला थिइनँ ।’

उनले आफू पञ्चायतको को–अर्डिनेशन कालदेखि नै, मालेकालदेखि नै मृत्यु त हातमा बोकेर हिँडेकाले डर नलागेको पनि बताएका छन् । उनी श्रीमतीलाई दिल्लीमा उपचार गराइरहेकै अवस्थामा पार्टीको बैठकमा भाग लिन काठमाडौं आएका हुन् ।