काठमाडौं– पाकिस्तानमा पोलियो रोगका थप बिरामी फेला परेका छन् । खैबर पख्तुनख्वा प्रान्तमा थप दुई जनामा पोलियोको सङ्क्रमण फेला परेको पाकिस्तानी सञ्चार माध्यमले जनाएका छन् ।

खैबर पख्तुनख्वाको टाङ्क क्षेत्रकी १६ महिने बालिका र सोही प्रान्तको उत्तरी वजिरिस्तानकी २४ महिने बालिकामा पोलियो भेटिएको हो । बिजनेश रेकर्डर अनुसार यससँगै मुलुकमा यस वर्ष पोलियो भेटिएका बिरामीको सङ्ख्या २३ पुगेको छ ।

यीमध्ये सबैभन्दा धेरै खैबर पख्तुनख्वामा छन् । सो प्रान्तमा १५ जनामा पोलियो देखा परेको छ । त्यसैगरी, सिन्धमा ६ तथा पञ्जाब र गिल्गिट बाल्टिस्तानमा एक जनामा पोलियो भेटिएको छ ।

गत वर्ष पाकिस्तानमा ७४ जनामा पोलियो भेटिएको थियो । यसमध्ये २७ जना बलोचिस्तानका थिए भने २३ जना खैबर पख्तुनख्वा, २२ जना सिन्ध र एक जना गिल्गिट बाल्टिस्तानका थिए ।