काठमाडौं– गत आर्थिक वर्षको उखुको अनुदान भुक्तानीको माग गर्दै आन्दोलनरत उखु किसानहरूले अनिश्चितकालीन राष्ट्रिय राजमार्ग अवरुद्ध गर्ने चेतावनी दिएका छन् । 

शनिबार माइतिघरमा पत्रकार सम्मेलन गर्दै उखु किसानहरूले आफ्ना मागप्रति सरकारले वेवास्ता गरेको भन्दै भाद्र २५ गतेदेखि  अनिश्चितकालीन राष्ट्रिय राजमार्ग अवरुद्ध गर्ने चेतावनी दिएका हुन् ।

सबै जिल्लाका उखु किसानहरूको सक्रिय सहभागितामा सर्लाहीको हरिवनमा भाद्र २५ गतेबाट अनिश्चितकालीन राष्ट्रिय राजमार्ग अवरुद्ध गर्ने सर्वसम्मत निर्णय गरिएको उखु उत्पादक महासङ्घ, नेपालका प्रवक्ता उमेशचन्द्र यादवले जानकारी दिए ।

आफूहरूको आन्दोलनबाट हुने क्षतिको जिम्मा सरकार, अर्थमन्त्रालय र प्रधानमन्त्री तथा मन्त्रिपरिषद्को कार्यालयले लिनुपर्ने उनले बताए ।

उखु किसानले उपलब्ध गराउन बाँकी अनुदान रकम बिनासर्त भुक्तानी गर्नुपर्ने, उखुको मूल्य तोक्दा किसान प्रतिनिधिहरूको सहभागिता सुनिश्चितता गर्नुपर्ने लगायतमा माग राखेका छन् ।