काठमाडौं– बागमती प्रदेशका मुख्यमन्त्री बहादुरसिंह लामाले पदबाट राजीनामा नदिने दोहोर्‍याएका छन् । प्रदेश राजधानी हेटौंडामा सञ्चारकर्मीसँग कुरा गर्दै उनले मुख्यमन्त्रीबाट राजीनामा दिनुपर्ने कुनै आधार नै नभएको दाबी गरे । 

‘राजीनामा दिनुपर्ने कुनै कारण छैन । हामी संविधानअनुसार चल्छौँ,’ संसदीय दलको नेतामा पराजित भए लगत्तै लामाले भने, ‘संविधानले जे व्यवस्था गरेको छ, त्यसैअनुसार अघि बढ्ने हो ।’

उनी बुधबार भएको निर्वाचनमा इन्द्रबहादुर बानियाँसँग संसदीय दलको निर्वाचनमा पराजित भएका छन् । कांग्रेसका ३७ प्रदेशसभा सदस्यमध्ये बानियाँको पक्षमा २२ र  मुख्यमन्त्री लामाको पक्षमा १४ मत खसेको छ । 

एक मत बदर भएको छ । यसअघि मंगलबार संसदीय दलको बैठकमा मुख्यमन्त्री लामाविरुद्ध दर्ता भएको अविश्वासको मत बहुमतले पारित भएको थियो ।