काठमाडौं– नेपाली कांग्रेसको भ्रातृ संगठन नेपाल किसान महासंघले आगामी भदौ ३ गते महाधिवेशन गर्ने तयारी गरेको छ । महामन्त्री गगनकुमार थापाले सोमबार केन्द्रीय कार्यसमिति बैठकमा किसान महासंघले महाधिवेशनका लागि पार्टी समक्ष मिति प्रस्ताव गरेको जानकारी गराएका छन् । 

‘नेपाल किसान महासंघले भदौ ३ गते महाधिवेशन गर्ने भनेर पार्टीलाई जानकारी गराएको छ,’ उनले भने । 

महामन्त्री थापाका अनुसार अर्को भ्रातृ संगठन नेपाल थारू संघले महाधिवेशनका लागि दुईवटा मिति प्रस्ताव गरेको छ । 

‘नेपाल थारु संघले दुईवटा मिति प्रस्ताव गर्नुभएको छ,’ उनले भने, ‘एउटा असोज २५ देखि २७ गतेसम्म अर्को भाद्र २८ देखि ३० ।’ 

पार्टीले भदौमा महाधिवेशन गर्न निर्देशन दिए थारु संघले कैलालीको टीकापुरमा महाधिवेशन आयोजना गर्ने मनस्थिति बनाएको छ ।  

‘भाद्र २८ देखि ३० कैलालीको टीकापुरमा गर्ने भन्ने सोच बनाएको देखिन्छ । मौसमको कारणले गर्दा अप्ठ्यारो हुन्छ कि पनि भन्नुभएको छ,’ थापाले भने, ‘पार्टीले हुन्छ भन्यो भने हामी भाद्रमै गर्न तयार छौँ भन्ने उहाँहरूको कुरो छ ।’ 

यस्तै अर्को भ्रातृ संगठन नेपाल लोकतान्त्रिक खेलकुद संघले भदौ २० र २१ गते महाधिवेशनका लागि पार्टीसमक्ष प्रस्ताव गरेको छ । 
थापाले नेपाल तरूण दलको महाधिवेशन मंसिर २६–२८ मा गर्ने गरी प्रस्ताव गरेका छन् । 

महामन्त्री थापाले बैठकमा आगामी माघ मसान्तभित्र सबै भ्रातृ संगठनहरूको महाधिवेशन गरिसक्नुपर्ने प्रस्ताव गरेका छन् ।