काठमाडौं- नेपाल शिक्षक महासंघले संसद्‍बाट पारित गर्ने तयारीमा रहेको विद्यालय शिक्षा विधेयकलाई लिएर फेरि आन्दोलनमा उत्रिने चेतावनी दिएको छ ।

महासंघसँग गत वैशाख १७ गते आफूहरूसँग भएको सहमतिअनुसार प्रतिनिधिसभाबाट तत्काल शिक्षा विधेयक पारित नभए फेरि आन्दोलनमा होमिने चेतावनी सोमबार एक वक्तव्य जारी गर्दै महासंघले चेतावी दिएको हो ।

संसद्को शिक्षा, स्वास्थ्य तथा सूचना प्रविधि समितिमा विधेयकबारे अहिले छलफल चलिरहेको छ । तर निजी विद्यालयलाई भविष्यमा के गर्ने ?, राहत शिक्षकहरूको व्यवस्थापन कसरी गर्नेसहितका विषयमा अझै पनि सहमति जुटिसकेको छैन।

यस्तो अवस्थामा महासंघका अध्यक्ष लक्ष्मीकिशोर सुवेदी र महासचिव तुलाबहादुर थापा मगरले सोमबार एक वक्तव्य जारी गर्दै सहमति अनुसार यथाशीघ्र विधेयक पास गर्न भनेका हुन् ।

विगतका सहमतिहरू समावेश गरिएको अग्रगामी विद्यालय शिक्षा विधेयक अविलम्ब प्रतिनिधि सभामा पेश गरी पारित गराउनुपर्ने माग पनि महासंघले सरकारसँग गरेको छ ।

‘यो कार्यमा विलम्व गर्ने सुविधा कसैलाई छैन । यस काममा कुनै पनि खालको विलम्व र षडयन्त्र भएमा नेपाल शिक्षक महासङ्घ तुरुन्तै आन्दोलनमा जान बाध्य हुने कुरा उद्घोष गर्दछौँ,’ अध्यक्ष सुवेदी र महासचिव थापाले भनेका छन् ।

अबको आन्दोलनबाट सिर्जना हुन सक्ने परिणामप्रति सचेत रहन तथा यो परिस्थिति निर्माण हुन नदिन सक्रिय र गम्भीर रहन महासंघले सरकारलाई आग्रह गरेको छ ।

महासंघले यसअघि २०८१ चैतदेखि २०८१२ वैशाखसम्म २९ दिने काठमाडौंकेन्द्रित आन्दोलन गरेको थियो । उक्त आन्दोलनलाई वैशाख १७ गते विश्राम दिने क्रममा असार १५ गतेभित्र शिक्षा विधेयक प्रतिनिधिसभाबाट पारित गराउने सहमति भएको थियो ।

महासंघले सरकारी प्रतिबद्धताअनुरुप असार १५ गतेसम्म विद्यालय शिक्षा विधेयक प्रतिनिधि सभामा पेश नभएका कारण आमनेपाली, शिक्षक-कर्मचारी सशंकित र आक्रोशित भएका पनि जनाएको छ।