काठमाडौं– नेपाली कांग्रेसका नेता मीन विश्वकर्माले संसदलाई मर्यादित, व्यवस्थित, तथ्यपरक बहस र गरिमामय स्थल बनाउनु पर्नेमा जोड दिएका छन् ।

संसद दिवसको अवसरमा सोमबार सामाजिक सञ्जालमार्फत उनले संसदीय आचरण, व्यवहार, क्षमता र दक्षतासँग सांसदको मात्र नभइ सम्बन्धित दल र मुलुककै प्रतिष्ठा जोडिने भएकाले यसलाई मर्यादित बनाउन समयमै ध्यान दिनुपर्ने बताएका छन् ।

गत जेठ १२ गतेदेखि राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा)ले भिजिट भिसा प्रकरणलाई लिएर संसदमा अवरोध गर्दै आएकाेप्रति लक्षित गर्दै उनले संसदमा हुने सबै गतिविधि भावी पुस्ताका लागि शिक्षा हुने भएकाले मर्यादित, व्यवस्थित, तथ्यपरक बहस र गरिमामय बनाउनु पर्नेमा जोड दिएका छन् । उनले संसद जनताको सार्वभौम अधिकार सम्पन्न राज्यको सर्वोच्च अङ्ग भएको नबिर्सन पनि आग्रह गरेका छन् । 

उनले भनेका छन्, ‘संसदप्रति मुलुककै प्रतिष्ठा जोडिएको हुन्छ, सम्बन्धित पदाधिकारी, सदस्य, संस्था र दलको बेलैमा ध्यानाकर्षण हुनु जरूरी छ । बानी साह्रै बिग्रिएपछि सच्याउन कठिन हुन्छ ।’

उनले पहिलेका संसदीय गतिविधिमा विवाद, झडपहरू नीतिगत र विषय केन्द्रित हुने गरेको स्मरण गर्दै २०७९ साल पछिको वर्तमान संसद भने अधिकांश असंसदीय, विषयवस्तु विहीन, व्यक्ति विशेष, तथ्यहीन, स्तरहीन गालीगलौच र भ्रमात्मक बहसमा दौडने मैदान बनेको भन्दै चिन्ता व्यक्त गरेका छन् ।

उनले यस्तो अवस्था नागरिक अधिकार रक्षा  र संसदीय व्यवस्थाको उन्नत विकास र अभ्यासका लागि कदापी राम्रो नहुने उल्लेख गरेका छन् ।