काठमाडौं- लिभरपुलका डिफेन्डर ट्रेण्ट एलेक्जेन्डर अर्नोल्ड स्पेनिस क्लब रियल मड्रिडमा अनुबन्ध भएका छन् ।

इङ्लिस क्लब लिभरपुलसँगको अनुबन्ध यसै सिजनमा समाप्त भएपछि उनी फ्रीमा रियल मड्रिडमा गएका हुन् ।

अर्नोल्ड अब यही १ जुनदेखि रियल म्याड्रिडका खेलाडी बन्ने छन् । लिभरपुलले उनीसँगको सम्झौता समयभन्दा अगाडि टुंग्याउन सहमत भएसँगै उनी स्पेनको यात्रामा निस्किएका हुन् ।

लिभरपुलबाट रियल म्याड्रिडमा स्थानान्तरण भएका इंग्ल्यान्डका राइट-ब्याक अब स्पेनी क्लबमा सामेल भएर क्लब विश्वकप खेल्न पाउनेछन्।

अलेक्ज्याण्डर-अर्नोल्डले यसै सिजनमा लिभरपुल छाड्ने घोषणा गरिसकेका थिए । अब उनले रियल म्याड्रिडसँग ६ वर्षे सम्झौता गरेका छन्।

२६ वर्षीय अलेक्ज्याण्डर-अर्नोल्डले ३० जुनमा सम्झौता सकिउपछि लिभरपुलबाट बिदा हुन सक्थे । तर अब उनी क्लबले सहमति जनाएपछि एक महिनाअघि नै लिभरपुलबाट बिदा भएका हुन् ।

फिफाले यस गर्मीयामका लागि जुन १ देखि १० जुनसम्म एक अतिरिक्त स्थानान्तरण विन्डो स्वीकृत गरेको छ । जसले क्लब विश्वकपका लागि नयाँ खेलाडी दर्ता गर्न क्लबहरूलाई अनुमति दिएको छ । यो प्रतियोगिता १४ जुनदेखि अमेरिकामा सुरु हुँदैछ।

अलेक्ज्याण्डर-अर्नोल्ड ६ वर्षको उमेरमा आफ्नो जन्मथलोको क्लब लिभरपुलमा सामेल भएका थिए । उनी लिभरपुलमा रहँदा दुई प्रिमियर लिग उपाधि, च्याम्पियन्स लिग, फिफा क्लब विश्वकप, युइएफए सुपर कप, एफए कप र लिग कप जिते ।

यसै महिनाको सुरुमा उनले नयाँ चुनौती अनुभव गर्न र व्यक्तिगत तथा व्यवसायिक रूपमा आफूलाई अझ अघि बढाउन क्लब छाड्ने निर्णयमा पुगेको बताएका थिए ।

अलेक्ज्याण्डर-अर्नोल्डले लिभरपुलका लागि ३५२ खेलमा २३ गोल र ८६ असिस्ट गरेका छन्।

अब उनी इङ्ल्यान्ड टिमका सहकर्मी जुड बेलिङ्घमसँग रियल म्याड्रिडबाट खेल्ने छन् । यसका साथै क्लबका पूर्वखेलाडी र हाल रियल म्याड्रिडका प्रशिक्षक जाबी अलोन्सोको कमानमा उनले खेल्न पाउने छन् ।

४३ वर्षीय अलोन्सोले कार्लो एन्चेलोटीको स्थानमा यही सिजन रियल म्याड्रिडको मुख्य प्रशिक्षक बनिसकेका छन् । क्लबले सन् २०२०-२१ यता पहिलो पटक कुनै प्रमुख घरेलु वा युरोपेली उपाधि जित्न सकेन । त्यहीकारण एन्चेलोटीलाई बिदा गरेर नयाँ प्रशिक्षक भित्र्याइएको हो ।