काठमाडौं– नेपाली कांग्रेसको आगामी सभापतिका लागि छट्टाछुट्टै तयारी गरिरहेका डा. शेखर कोइराला र महामन्त्री गगनकुमार थापाबीच लामो समयपछि भेटवार्ता भएको छ ।

पार्टीको १४ औँ महाधिवेशनमा एउटै समूह बनाएर चुनावी प्रतिस्पर्धामा उत्रिएका दुई नेताबीच शुक्रबार बालुवाटारस्थित कोइरालाको सम्पर्क कार्यालयमा भेटवार्ता भएको हो । विगत ११ महिनादेखि संवादमा नरहेका नेता कोइराला र महामन्त्री थापाबीच शुक्रबार संवाद भएको कोइरालानिकट स्रोतले पुष्टि गरेको छ ।

‘सभापतिले शुक्रबार अनुशासन समितिको बैठक बोलाउनुभएको थियो । त्यसअघि डाक्सापले महामन्त्रीलाई आफ्नो सचिवालयमा बोलाएर कुराकानी गर्नुभएको हो,’ कोइरालानिकट स्रोतले भन्यो ।

दुई नेताबीच दूरी बढ्नु समूहका लागि राम्रो नभएको भन्दै नेता–कार्यकर्ताहरूले संवाद गर्नुपर्ने दबाब दिन थालेपछि कोइराला र महामन्त्री थापाबीच भेट भएको बताइएको छ । उक्त भेटमा केन्द्रीय सदस्यहरू सञ्जयकुमार गौतम र राजीव कोइराला पनि सहभागी थिए ।

स्रोतले कोइराला र थापाबीच केहीबेर एक्ला–एक्लै समेत कुराकानी भएको दावी गरेको छ । कांग्रेस र एमाले गठबन्धन सरकारको मन्त्रिपरिषद्मा पठाउने नेताहरूबारे छलफल गर्दा उनीहरूबीच पछिल्लो संवाद भएको थियो ।

त्यसयता कोइराला–थापाबीच शुक्रबार भेटवार्ता भएको हो । स्रोतका अनुसार शुक्रबारको भेटमा उनीहरूबीच पार्टीको अनुशासन समितिको काम–कारबाही, क्रियाशील सदस्यता, आगामी महाधिवेशनको कार्यतालिका लगायत विषयमा छलफल भएको छ ।