काठमाडौं– नेपाली कांग्रेसका सांसद राजेन्द्र बजगाईंले नेपाल हवाई सेवा प्राधिकरणको स्थापना र व्यवस्था गर्न बनेको विधेयक, २०८१ मा संशोधनको सूचना दर्ता गरेका छन् । उनले प्रतिनिधिसभामा बुधबार विधेयकमा संशोधनको सूचना दर्ता गरेका हुन् ।   

सांसद बजगाईंले प्रतिनिधिसभा नियमावली, २०७९ को नियम ११३ (१) मा उल्लिखित शर्तको अधीनमा रही नियम ११२ बमोजिम विधेयकको प्रस्तावना दफा १२ को उपदफा २ मा संशोधन सूचना दर्ता गरेको बताए । 

उपदफा २ मा ‘प्राधिकरणले आफूअन्तर्गतको विमानस्थल नेपाल सरकारको स्वीकृत लिई कुनै सरकारी वा गैर-सरकारी निकाय वा प्रतिस्पर्धात्मक विधिबाट निजी क्षेत्रलाई करार सम्झौता, सार्वजनिक निजी साझेदारी वा प्राधिकरणसँग संयुक्त कम्पनी बनाई निर्माण, सञ्चालन तथा व्यवस्थापन गर्न दिन सक्ने छ,’ थप गर्नुपर्ने दर्ता सूचनामा उल्लेख छ ।