काठमाडौं– गत शुक्रबार काठमाडौंको तीनकुनेमा भएको राजावादीहरूको हिंश्रक प्रदर्शनका क्रममा प्रहरीको बन्दुक खोस्ने युवक पक्राउ परेका छन् ।

तीनकुनेमा राजावादीको प्रदर्शनका क्रममा भएको झडपका क्रममा सुरक्षाका लागि ब्याक फोर्सका रुपमा खटिएको सशस्त्र प्रहरी बलको बन्दुक खोस्ने ३८ वर्षीय गोपाल हमाल शनिबार नै गौशालाबाट पक्राउ परेका हुन् ।

जिल्ला प्रहरी परिसर काठमाडौंका प्रवक्ता एवम् एसपी अपीलराज बोहोराले हमाललाई गौशाला क्षेत्रबाट शनिबार नै पक्राउ गरेर आइतबार जिल्ला अदालत काठमाडौंमा पेश गरिएको छ । उनलाई आवश्यक अनुसन्धानका लागि अदालतबाट ५ दिनको म्याद लिइएको छ।

प्रहरीका अनुसार हमालले खोसेको उक्त बन्दुक भने भेटिएको छैन । उक्त बन्दुक अश्रुग्यास हान्न प्रयोग गरिन्छ ।

बोहोराका अनुसार हमाल रुपन्देहीको सैनामैना नगरपालिका-१ निवासी हुन् । उनी अहिले काठमाडौंको तारकेश्वर नगरपालिका-१० मा बस्दै आएका थिए ।

सशस्त्र प्रहरीको ग्यास गन खोस्ने काम गरेका उनलाई राज्यद्रोह र संगठित अपराधमा मुद्दा चलाउन अदालतबाट म्याद लिइएको प्रवक्ता बोहोराले खबरहबलाई बताए ।

हमालले बन्दुक खोसेको फोटो खिच्ने क्रममा अनलाइनखबरका पत्रकार दिनेश गौतममाथि राजावादीले आक्रमण गरेका थिए । उनलाई आक्रमण गरेर राजावादीले खुट्टो भाँचिदिएका छन् ।