सुनसरी– फुटबल जीवनको संघर्षमय भित्री पाटोलाई फिल्ममार्फत उतारिए पछि फुटबलर एन्जिला तुम्बापो लिम्बू अहिले राष्ट्रिय चर्चामा छिन् ।
उनको जीवनीमा आधारित फिल्म ‘एन्जिला’ सिनेमा हलमा लागेको दुई साता बितिसकेको छ । उनको बायोपिक ‘एञ्जिला’ले बक्स अफिसमा राम्रो कमाई गरिरहेको छ । फिल्मको प्रवर्द्धन गर्नकै लागि उनी ग्रिसबाट शुक्रबार मात्र नेपाल आइपुगेकी उनी अहिले विभिन्न हलहरूमा पुगेर दर्शकसँग प्रत्यक्ष भेटघाट र प्रतिक्रिया लिन व्यस्त छिन् । सवैतिर उनको भव्य स्वागत र सम्मान भइरहेको छ ।
यसै सिलसिलामा चलचित्रको प्रवर्द्धन गर्न राष्ट्रिय महिला फुटबल टिमकी कप्तान एवं गोलकिपर एन्जिला तुम्बापो लिम्बू पूर्व आएको बेला धरानमा सम्मान गरिएको छ । याक्थुङ चलचित्र संघ नेपालले च्याब्रुङ बजाउँदै फ्रेन्ड्स सिनेमा हलमा उनीसहित एन्जिला चलचित्र टिमलाई भव्य स्वागत गरेको थियो ।
आफ्नै जीवनीमा आधारित चलचित्र ‘एन्जिलाको’ थप प्रचार प्रसार र प्रवर्द्धन गर्न उनी पूर्वको यात्रामा निस्केको बताइन् । शनिबार धरानको फ्रेन्ड्स सिनेमा हल आएकी उनलाई धरान फुटबल क्लबले सम्मान गर्यो ।
उनलाई क्लबका अध्यक्ष प्रताप तामाङले दोसल्ला ओढाउँदै सम्मान पत्र प्रदान गरेका थिए । उक्त अवसरमा निर्देशक मिलन चाम्स र कलाकार सिर्जना सुब्बा र निर्माता प्रेमकुमार श्रेष्ठलाई पनि दोसल्ला ओढाएर सम्मान गरिएको थियो । उनले एन्फा एकेडेमीमा पुगेर एकेडेमीका जुनियर विद्यार्थीसँग भलाकुसारी गरिन् ।
शनिबार राती नै धरान रंगशालामा जारी रात्रिकालीन २५ औँ गोधुली रनिङ कप फुटबल प्रतियोगितामा पुग्दा प्यारापिटमा बसेका दर्शकहरूले उठेर ‘एन्जिला एन्जिला’ भन्दै सम्मान गरेका थिए ।
उनले दर्शकको मायाबाट हौसिएर ग्रीसबाट छोटो समयकालागि नेपाल आएको बताइन् । आफूले अभिनय गरेको चलचित्र एन्जिलालाई दर्शकले अति मनपराए पनि आगामी भविष्यमा भने कुनै पनि चलचित्रमा अभिनय नगर्ने अभिव्यक्ति भने दोहोर्याइन् ।
उनले भनिन्, ‘आफ्नै जीवनीमा आधारित फिल्म भएकाले मात्र यसमा समय निकालेर अभिनय गरेको हो । म सिनेमा खेल्नका लागि जन्मेकी होइन । फुटबलबाट नै चिनिन र आफ्नो भविष्य सुनिश्चित गर्न चाहन्छु ।’ उनी हाल ग्रिसको शीर्ष डिभिजनको महिला फुटबल लिग अन्तर्गतको खेलमा निस एट्रोमिनौट क्लवबाट खेलिरहेकी छन् । पूर्वको भ्रमणमा आउँदा उनको सुरक्षा सशस्त्र प्रहरी बलले गरिरहेको छ ।
नेपाली महिला फुटबलको क्याप्टेन एन्जिलालाई दर्शकले रंगशालामाहरुमा एउटी राष्ट्रिय खेलाडी, राम्रो गोल किपरको रूपमा मात्र चिन्दै आएका थिए । तर उनको बायोपिक चलचित्र ‘एन्जिला’ ले राष्ट्रिय महिला फुटबल टोलीसम्म आइपुग्न कतिसम्म संघर्ष गरिन् भन्ने जानकारी मात्र दिँदैन पारिवारिक विग्रह, गरिबी, बाबुको बेवास्ता, सामाजिक अवरोधकाबीच आमाको प्रेम र संघर्षबाट प्रेरणा र साथ पाएर सफलता हात पार्न सकिन्छ भन्ने सन्देश दिएको छ ।
फिल्ममा एञ्जिला आफैले अभिनय गरेकी छिन् । उनको आमाको भूमिका सिर्जना सुब्बाले गरेकी छिन् । सृजना सुब्बा पनि एन्जिलाको प्रवर्द्धनकै लागि भनेर बेलायतबाट १० दिनको लागि भनेर नेपाल आएकी छन् ।
एन्जिलाको बाल्यकालको भूमिकामा धरानकी नमिक्षा मगरको अभिनय छ भने बुबाको भूमिकामा दयाहाङ राई छन् । आइतबार (आज) पनि झापाको बिर्तामोड र दमकका सिनेमा हलमा दर्शकसँग भेटघाटमा व्यस्त छन् एन्जिला टिम ।
प्रतिक्रिया