काठमाडौं– काठमाडौंमा गत शुक्रवार भएको हिंसात्मक प्रदर्शनमा संलग्न रहेको आरोपमा पक्राउ परेकामाथि मुद्दा चलाइने भएको छ ।

पक्राउ परेका राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रवीन्द्र मिश्र र महामन्त्री धवल शमशेर राणालगायतलाई अदालतमा उपस्थित गराएर मुद्दा चलाइन लागिएको हो ।

राप्रपाका दुई नेता, स्वागत नेपाल, पुष्कर खतिवडा लगायतलाई अहिले केहीबेरमा म्याद थपका लागि अदालत लगिँदै छ ।

मिश्र, राणा र नेपाल गत शुक्रबार राती पक्राउ परेका थिए भने धार्मिक गुरु भनिने पुष्कर खतिवडा शनिबार पक्राउ परेका हुन् ।

काठमाडौं उपत्यका अपराध अनुसन्धान कार्यालयको टोलीले पक्राउ परेका उनीहरूलाई काठमाडौं परिसरको जिम्मा लगाएको थियो।