काठमाडौं– सत्ता साझेदार र प्रतिपक्षमा रहेका मधेश केन्द्रित विभिन्न आठ दलहरूले कार्यदल गठन गरेका छन् । मोर्चा गठन गर्ने उद्देश्यले बिहीबार सिंहदरबारस्थित अन्तर्राष्ट्रिय सम्बन्ध समितिको हलमा बसेको बैठकले आठ सदस्यीय कार्यदल गठन गरेको हो ।   

बैठकमा जनता समाजवादी पार्टी (जसपा), जनता समाजवादी पार्टी (जसपा), नेपाल, जनमत पार्टी,  नागरिक उन्मुक्ति पार्टी, लोकतान्त्रिक समाजवादी पार्टी (लोसपा), राष्ट्रिय मुक्ति पार्टी नेपाल, जनता प्रगतिशील पार्टी र तराई मधेश लोकतान्त्रिक पार्टी (तमलोपा) सहभागी छन् । 

कार्यदलमा जनता समाजवादी पार्टी (जसपा)का इस्तियाक राई, जनमत पार्टीका शरदसिंह यादव, जसपा नेपालका मनिष सुमन, नागरिक उन्मुक्ति पार्टीका गंगाराम चौधरी, लोसपाका लक्ष्मणलाल कर्ण, राष्ट्रिय मुक्ति पार्टी नेपालका केशव झा, जनता प्रगतिशीलका शिवजी यादव र तमलोपाका ब्रजेस सिंह रहेका छन् । 

कार्यदलले अवधारणा, एजेन्डा, मोडिलाटी र आचारसंहिता सँगसँगै समग्र राजनीतिक परिस्थितिबारे दृष्टिकोण बनाएर शीर्ष नेताहरू समक्ष प्रतिवेदन पेस गर्ने सदस्य केशव झाले जानकारी दिए । 

‘यसले अवधारणा तयार गर्छ, एजेन्डा तय गर्छ र मोडिलाटी, आचारसंहिताहरू तयार गर्छ,’ उनले खबरहबसँग भने, ‘खासमा समग्र राजनीतिक परिस्थितिको बारेमा दृष्टिकोण बनाएर शीर्ष नेताहरू समक्ष पेस गर्छ ।’

बैठकले कार्यदलले शीर्ष नेताहरूलाई बुझाउने प्रतिवेदनको म्याद बुझाउने समय भने तय गरेको छैन । ‘कार्यदलले कहिलेसम्म प्रतिवेदन बुझाउने भनेर म्याद तय गरिएको छैन,’ नेता झाले भने, ‘छिट्टै गर्ने भनिएको छ । कार्यदलको बैठक बस्ने बित्तिकै त्यसैले समय निर्धारण गर्छ ।’  

बैठकमा जसपाबाट रेणु यादव, जनमतबाट शरदसिंह यादव, जसपा नेपालबाट राजकिशोर यादव, रामकुमार शर्मा र मनिष सुमन, नागरिक उन्मुक्तिबाट लालवीर चौधरी र गंगा चौधरी सहभागी थिए । 

यस्तै लोसपाबाट सर्वेन्द्रनाथ शुक्ल र लक्ष्मणलाल कर्ण, राष्ट्रिय मुक्ति पार्टी नेपालबाट रामनरेश राय, केशव झा र सन्तोष मेहता, जनता प्रगतिशीलबाट हृदयेश त्रिपाठी, शिवजी यादव र सब्बिर हुसैन तथा तमलोपाबाट वृषेशचन्द्र लाल र विजय सिंहको उपस्थिति रहेको थियो ।