काठमाडौं – प्रतिनिधिसभा निर्वाचनका लागि नेपाली कम्युनिस्ट पार्टीले यसअघिसम्म मन्त्री वा संघीय–प्रदेश सांसद नबनेका व्यक्तिलाई समानुपातिकतर्फ प्राथमिकतामा राख्दै उम्मेदवार छनोट गरेको छ।

पार्टीका नेता वर्षमान पुनका अनुसार समानुपातिक सूची तयार गर्दा समाजका विविध क्षेत्र र समुदायको प्रतिनिधित्व सुनिश्चित गर्ने प्रयास गरिएको हो। अनुभवी विज्ञदेखि युवा पुस्ता, सहिद परिवारका सदस्य, अल्पसंख्यक समुदाय तथा विभिन्न पेशागत पृष्ठभूमिका व्यक्तिहरूलाई समेटिएको उनले बताए।

पार्टीले पटक–पटक अवसर पाइसकेका अनुहारभन्दा पनि नयाँ र योगदान गर्न सक्ने व्यक्तिलाई अघि बढाउने नीति लिएको पुनले जानकारी दिए । त्यसअनुसार उद्यम–व्यवसाय, कूटनीति, मानवअधिकार, शैक्षिक तथा सामाजिक क्षेत्रमा सक्रिय व्यक्तिहरू समानुपातिक सूचीमा समावेश भएका छन्। पार्टी एकतामा सहभागी भएका १७ वटा घटक दलको भावना झल्कने गरी सूची तयार गरिएको जनाइएको छ।

समानुपातिक उम्मेदवारका रूपमा अधिकारकर्मी मित्र परियार, पूर्वराजदूत प्रमेश हमाल, विज्ञ परशुराम तामाङ, जोगकुमार बर्बरियाको नाम बन्दसूचीमा छ ।

यस्तै बीबी खनाल, पूर्व विद्यार्थी संगठनका अध्यक्ष पञ्चा सिंह, चेपाङ समुदायबाट मंगलसिंह प्रजा, पूर्व लडाकु कमान्डर कमला नहर्की, नेकपाबाट आएका नेता चिरन पुन, पार्वती विक, महेन्द्रबहादुर कार्की लगायतकाे नाम बन्दसूचीमा समेटिएको छ ।