काठमाडौं- राष्ट्रिय मुक्ति पार्टीका अध्यक्ष राजेन्द्र महतोले राष्ट्रिय स्वतन्त्र पार्टीका सभापति रवि लामिछाने र काठमाडौंका मेयर बालेन्द्र साह मिल्नु कुनै अनौठो नभएको बताएका छन् ।

सोमबार निर्वाचन आयोगमा समानुतिकको बन्दसूची बुझाएर निस्किने क्रममा उनले यस्तो बताएका हुन् ।

उनले आफूहरूको पार्टीबाट जेन-जीहरूलाई पनि उम्मेदवार बनाउने बताउँदै बालेन र रविको मिलनलाई सामान्य भने ।

‘बालेन र रवि मिल्नु नौलो होइन । जनताले मत दियो भने बालेन्द्र साह पनि प्रधानमन्त्री बन्न सक्छ’, उनले भने, ‘यो कुनै अनौठो कुरा भएन ।’

उता जनता समाजवादी पार्टीका अध्यक्ष अशोक राईले रेणु यादवहरू जसपा नेपालतिर फर्किनुलाई सामान्य भने ।

‘जसपाबाट रेणु जसपा नेपालतिर जानु एउटा स्वभाविक र प्राकृतिक विषय हो । मानिसलाई जहाँ सहज हुन्छ, त्यहाँ बस्न पाउँछ’, उनले भने।

राईले उपेन्द्र यादवसँगको झगडाबारे पनि बोले । ‘उपेन्द्र यादवले मलाई देखाएको पनि होइन, मैले पनि उनलाई देखाएको होइन । तपाईंहरूले हेरेको मात्रै हो’, उनले अगाडि भने ।