किन्शासा – उत्तरपश्चिमी कङ्गोको माई–डोम्बे तालमा यात्रुबाहक डुङ्गा पल्टिँदा कम्तीमा २० जनाको मृत्यु भएको र अझै धेरैजना बेपत्ता रहेको स्थानीय बासिन्दाहरूले बताएका छन् । दुर्घटनाग्रस्त डुङ्गा बिहीबार राजधानी किन्शासातिर जाँदै थियो । स्थानीय डायोसिसद्वारा जारी शुक्रबारको विज्ञप्तिअनुसार यात्रुमध्ये नयाँ नियुक्त क्याथोलिक डिकन पनि समावेश थिए ।

शनिबार एसोसिएटेड प्रेससँग टेलिफोनमार्फत कुराकानी गर्दै इनोङ्गोका बासिन्दा इम्मानुएल बोलाले डुङ्गा किरि सहरबाट किन्शासातर्फ जाँदै गर्दा बिहीबार राति करिब ८ बजे बोबेनी र लोबेके गाउँबीच पल्टिएको जानकारी दिए ।

कङ्गोली सरकारले अहिलेसम्म मृत्युको औपचारिक सङ्ख्या सार्वजनिक गरिसकेको छैन । माई–डोम्बे प्रान्तका गभर्नर केभानी एनकोसोले राष्ट्रिय टेलिभिजनमार्फत भने, “हामी घटनास्थलमा परिचालित टोलीहरूको विवरण पर्खिरहेका छौँ, मृतक र जीवित बचेका व्यक्तिहरूको यकिन सङ्ख्या उनीहरूले पुष्टि गरेपछि मात्र भन्न सकिन्छ ।”

धेरै नागरिकहरू खराब अवस्थामा रहेका सडकहरू प्रयोग गर्नुभन्दा जोखिमपूर्ण, सस्ता काठका डुङ्गामा यात्रा गर्न वाध्य भएकाले कङ्गोमा डुङ्गा दुर्घटना बढ्दै गएको छ । यस्ता डुङ्गाहरूमा यात्रु तथा सामानको अत्यधिक भार हुने गर्दछ, लाइफ ज्याकेटहरू प्रायः उपलब्ध हुँदैनन् र राति नै यात्रा गर्ने प्रचलन भएकोले दुर्घटना बढी घातक बन्छ । उद्धार कार्य पनि अन्धकारका कारण जटिल हुन्छ र धेरै शवहरू लामो समयसम्म फेला नपर्ने प्रवृत्ति छ ।

यस महिनाको सुरुतिरै भएको अर्को डुङ्गा दुर्घटनामा ६४ जना बेपत्ता भएका थिए । सेप्टेम्बरमा उत्तरपश्चिमी कङ्गोमा भएका दुई छुट्टाछुट्टै डुङ्गा दुर्घटनामा कम्तीमा १९३ जनाको मृत्यु भएको थियो, जसलाई सरकारी मिडियाले ‘अत्यधिक भार र रातिको नेभिगेसन’ लाई मुख्य कारण ठहर गरेको थियो ।