काठमाडौँ– सागर ढकाल जेन जीको प्रतिनिधि बनेर प्रधानमन्त्रीको सरकारी निवासमा बालुवाटारमा आयोजित सरकार, राजनीतिक दलसँगको बैठकमा सहभागी भए।

बैठकपछि उनले राजनीतिक दललाई बाइपास गरेर जान नसकिने भन्दै बैठकमा पनि यही विषयमा कुरा राखेको बताए।

‘दललाई बाइपास गरेर जान सकिँदैन। सरकारले नै पहिलो चरणमा छलफल गर्याे। सुरुवात भएको छ। यहाँ कुरा चुनावको धेरै आयो,’ उनले भने, ‘चुनाव मात्रै हो त ? भ्रष्टाचार र सुशासन मुख्य एजेन्डा हो नि त। प्रमुख पार्टीहरुलाई लोकतन्त्रका लागि धन्यवाद। प्रजातन्त्र आएको यतिका वर्षसम्म केही नगर्ने? अब त केही गर्नै पर्छ। निर्वाचन त गर्ने हो, सुधारिएको चुनाव गर्ने हो।’

बैठकपछि पत्रकारहरूसँग कुरा गर्दै उनले थपे, ‘विदेशमा भएकाले भोट हाल्न पाउनुपर्यो। जो जहाँ छ त्यहीँबाट भोट गर्ने व्यवस्था गर्नुपर्छ। टेक्नोलोजी फ्रेन्ली हुनुपर्छ भनियो।’

उनले नेकपा एमालेप्रति संकेत गर्दै चुनाव जान नसकिने भन्ने खाले कुरा गरेको बताए। आजको बैठकमा नेकपा एमालेका नेता महेश बर्ताैलाले भदौ २७ गते प्रधानमन्त्रीको सिफारिसमा राष्ट्रपति रामचन्द्र पौडेलद्वारा विघटन भएको संसद् ब्युँताएर जेनजीको माग सम्बोधन गर्न सकिने र अहिलेको अवस्थामा चुनावमा जान नसकिने बताएका थिए।