काठमाडौं – दक्षिण अफ्रिकाका अनुभवी अलराउन्डर वेन पार्नेल नेपाल प्रिमियर लिग (एनपीएल) खेल्न नेपाल आउने भएका छन्। उनले यस सिजनका लागि जनकपुर बोल्ट्ससँग सम्झौता गरेका हुन्।

जनकपुर बोल्ट्सले बुधबार सामाजिक सञ्जालमार्फत पार्नेललाई टिममा भित्र्याएको घोषणा गरेको हो। ३५ वर्षका पार्नेलले दक्षिण अफ्रिकाका लागि ३६ टी–२० अन्तर्राष्ट्रिय खेल खेलेका छन्। उनले त्यस अवधिमा ५९ विकेट लिएका छन् र ब्याटिङमा ३७४ रन बनाएका छन्।

पार्नेलले टी–२० बाहेक टेस्ट र एकदिवसीय दुवैमा पनि अफ्रिकी टोलीको प्रतिनिधित्व गरिसकेका छन्।अन्तर्राष्ट्रिय क्रिकेटसँगै उनले आईपीएल, बंगलादेश प्रिमियर लिग, द हन्ड्रेड र एसए–टि२० लिग लगायतका चर्चित फ्रेन्चाइज प्रतियोगितामा समेत उत्कृष्ट प्रदर्शन गरेका छन्।

उनको आगमनले जनकपुर बोल्ट्सलाई बलियो बनाउने विश्वास गरिएको छ। पार्नेलको अनुभव र आक्रमक शैलीले टोलीको बलिङ तथा ब्याटिङ दुवै विभागमा सन्तुलन ल्याउने अपेक्षा गरिएको छ। जनकपुर बोल्ट्सले अघिल्लो सिजनको एनपीएलको उपाधि जितेको थियो ।