काठमाडौं– प्रधानमन्त्री सुशीला कार्कीले यस वर्षको दशैंको टिका नलाउने भएकी छन्। 

गत भदौ २३ र २४ गते जेन-जीले आन्दोलनका क्रममा ज्यान गुमाएकाले यसपटक आफूले दशैंको टिका नलगाउने निर्णय गरेको उनको सचिवालयले जनाएको छ।

सचिवालयका अनुसार युवाले ज्यान गुमाएकाले यसपटक आफूले पनि टिका नलगाउने र अरुलाई पनि नलगाइदिने कार्कीको अठोट छ।

‘बडा दशैं प्रत्येक वर्ष हर्षोल्लासको साथ मनाउने चाड भए तापनि हालै सम्पन्न युवा पुस्ताको आन्दोलनका क्रममा धेरै युवाहरूले आफ्नो ज्यान गुमाउनु परेको पीडा पनि हामी सामु ताजै छ तसर्थ यस वर्ष सम्माननीय प्रधानमन्त्रीज्यूले आफ्नो बडा दशैंको टिका जमरा नलगाउनु हुने र देशवासीलाई समेत टिका लगाउने कार्यक्रम नरहेको व्यहोरा सबैलाई जानकारीका लागि सादर अनुरोध छ’, विज्ञप्तिमा भनिएको छ।

सचिवालय मार्फत शुभकामना सन्देश जारी गर्दै कार्कीले संसारभर छरिएर रहेका नेपालीहरूलाई दशैंको शुभकामना समेत दिइन्।