काठमाडौं– पूर्वराजा ज्ञानेन्द्र शाहले बडादशैँको उपलक्ष्यमा सबै नेपालीहरूमा सुख, शान्ति र समृद्धिको शुभकामना व्यक्त गरेका छन् ।

पूर्वराजा शाहले पूर्वजहरूले नेपालको एकता, अखण्डता, सार्वभौमिकता र सम्प्रभुताको रक्षा गर्न दिएका त्याग र बलिदान नै हाम्रो अस्तित्व, स्वाभिमान र गौरवशाली संस्कृतिको मेरुदण्ड भएको उल्लेख गरेका छन् ।

युवा पुस्ता भविष्यका आधारस्तम्भ भएको र उनीहरूमा निहित देशभक्तिको भावना, ऊर्जाशक्ति र नवीन सोचले मात्र राष्ट्रलाई बलियो, समृद्ध र आत्मनिर्भर बनाउने बाटोमा लैजाने उनको भनाइ छ ।

पूर्वराजा शाहले यस वर्षको विजयादशमीमा आम शुभेच्छुक नागरिक समुदायलाई आफूबाट वृहत रुपमा टीका जमरा प्रदान नहुने जानकारी गराएका छन् ।