काठमाडौं– दक्षिण प्रशान्त क्षेत्रमा अवस्थित मुलुक न्यूजिल्याण्डमा चिनियाँ हस्तक्षेप बढिरहेको त्यहाँको गुप्तचर निकायले जनाएको छ । न्यूजिल्याण्डको सुरक्षा गुप्तचर सेवाले मुलुकमा सबैभन्दा ठूलो विदेशी हस्तक्षेप चीनबाट भइरहेको जनाएको हो ।

वार्षिक जोखिम मूल्याङ्कन प्रतिवेदनमा पछिल्लो समय मुलुकले सबैभन्दा चुनौतीपूर्ण सुरक्षा अवस्थाको सामना गरिरहेको उल्लेख गरिएको छ । खासगरी राज्यहरुको अस्थीर सम्बन्धका कारण बढ्दो ध्रुवीकरण र असन्तोषका कारण यस्तो भइरहेको प्रतिवेदनमा उल्लेख गरिएको छ ।

यीमध्ये चीनले सबैभन्दा सक्रिय रुपमा वैदेशिक हस्तक्षेप गरिरहेको प्रतिवेदनमा उल्लेख रहेको च्यानल न्यूज एशियाले जनाएको छ । चीनले भने न्यूजिल्याण्डको गुप्तचर सेवाको यस आरोपको खण्डन गरेको छ ।

राजधानी वेलिङ्टनमा रहेको चिनियाँ राजदूतावासले गुप्तचर सेवाले दुई देशबीचको सम्बन्धलाई विषक्त बनाउन खोजेको र आशङ्का पैदा गरेको आरोप लगाएको छ । राजदूतावासले न्यूजिल्याण्डलाई सदैव चीनले मित्र र साझेदारका रुपमा व्यवहार गरिरहेको उल्लेख गरेको छ ।