काठमाडौँ- आम जनता पार्टीका अध्यक्ष तथा पूर्वमन्त्री प्रभु साहले कवाड व्यवसायी, उखु किसान र शिक्षक एक सातादेखि आन्दोलनरत हुँदा पनि सरकारले वास्ता नगरेको भन्दै आक्रोश पोखेका छन् ।

प्रतिनिधिसभाको शुक्रबार बसेको बैठकमा बोल्दै साहले यी आन्दोलनप्रति सरकारको कुनै गम्भीरता नदेखिएको भन्दै आलोचना गरेका हुन् ।

‘कवाड व्यवसायी, उखु किसान झण्डै एक सातादेखि आन्दोलनमा छन् । तर, सरकारलाई दुख्दैन, सरकारलाई छोएको छैन’, उनले भने, ‘सरकार बेखबरजस्तो छ । म सोध्न चाहन्छु–के सरकारको संवेदना मरेकै हो ? के अदालतको आदेश पालना हुन्छ कि हुँदैन ?’

उनले अदालतले स्टे अर्डर दिएर कवाड व्यवसाय सञ्चालन गर्न पाउनुपर्छ भने पनि काठमाडौँ महानगरपालिकाले अवज्ञा गर्दै व्यवसायीहरुमाथि कुटपिट र आक्रामण गरिरहेको बताए । कवाड व्यवसायीहरूमाथि भएको ज्यादती र डोजर आतंक गर्नेमाथि कानून लाग्नुपर्छ कि पर्दैन भनेर साहले प्रश्न गरे ।

‘यो सरकारले शान्ति, सुरक्षा गर्न सक्छ कि सक्दैन भनेर म सोध्न चाहन्छु । यत्रो पीडितहरुले शान्ति, सुरक्षा, क्षतिपूर्ति र अपराधीहरुलाई कारबाहीको माग गरेर आन्दोलन गर्दापनि, अदालतको आदेशको सम्मानको खातिर आन्दोलित बन्दा सरकार यसरी गैरजिम्मेवार बन्न मिल्दैन । मेरो आग्रह छ कि सरकार जिम्मेवार बनोस । आम नागरिकको सुरक्षाको ग्यारेन्टी गर्नु सरकारको हो,’ साहले भने ।

कवाडहरूले काठमाडौँलाई नै स्मार्ट सिटी बनाउन भूमिका खेलेको तर्क उनले गरे । काम नलाग्ने चिजहरुलाई कवाड व्यवसायीले निकालेर उद्योगमा पुर्‍याइदिएर काठमाडौँलाई सफा बनाउने काम गरेको साहको तर्क छ ।

उनले कवाड व्यावसायीहरूलाई देशभित्र र देशबाहिरको भनेर रंगभेदी कुरा गरिएकोमा पनि आपत्ति जनाए । उनले कवाड व्यवसायीले आफ्नो पुँजी, जवानी र सिंगो जीवन लगाएको भन्दै उनीहरूमाथिको निषेध आफूलाई स्वीकार्य नभएको चेतावनी दिए ।

काठमाठौँ महानगरपालिकाले ज्यादती गरेको भन्दै कवाड व्यवसायीलेले पाँच दिनदेखि आन्दोलन गर्दैआएका छन् । सर्वोच्च अदालतको आदेश पालना गर्नुपर्ने र कवाड व्यवसायीलाई शान्तिपूर्ण रुपमा व्यवसाय गर्न दिनुपर्ने माग गर्दै कवाड व्यवसायी आन्दोलित छन् ।