काठमाडौं– नेपाली कांग्रेसकी सांसद नागिना यादवले काठमाडौं महानगरपालिकाका नगर प्रहरी प्रमुख राजुनाथ पाण्डेले कवाड व्यवसायीमाथि रंगभेदी व्यवहार गरेको भन्दै आपत्ति जनाएकी छन् । 

 प्रतिनिधिसभाको शुक्रबारको बैठकको आकस्मिक समयमा बोल्दै उनले आन्दोलनरत कवाड व्यवसायीमाथि पाण्डेले रंगभेद गरेको भन्दै आपत्ति जनाएकी हुन् । 

‘महानगरका प्रहरी प्रमुखले जुन नेपाली भनेको गोरामात्रै हुन्, काला नेपाली होइनन् भनेर कवाडी व्यवसायीहरूलाई भनेको अभिव्यक्ति एकदम खेदजनक छ,’ सांसद यादवले भनिन्, ‘रंगले नेपाली हुने होइन । मान्छेको आफ्नो आइडेन्टिटी जन्मस्थलले नेपाली हुने हो ।’

उनले महानगर प्रहरी प्रमुख पाण्डेले आफूले दिएको अभिव्यक्तिप्रति माफी माग्नुपर्ने पनि बताइन् । ‘हिमालमा पनि काला छन्, तराईमा पनि काला छन् । त्यो वातावरणले असर गर्ने हो,’ सांसद यादवले भनिन्, ‘जुन अभिव्यक्ति महानगर प्रहरी प्रमुखले दिनुभएको छ, यो एक दम निन्दनीय छ । यस्ता अभिव्यक्तिप्रति उहाँले माफी माग्नुपर्छ ।’