काठमाडौं– प्रमुख प्रतिपक्षी नेकपा (माओवादी केन्द्र) का सांसद शक्तिबहादुर बस्नेतले उखु किसानले विगतमा पाउँदै आएको अनुदान रकम घटाउने सरकारको निर्णयलाई किसान विरोधी निर्णयको संज्ञा दिएका छन् । 

प्रतिनिधिसभाको शुक्रबारको बैठकको आकस्मिक समयमा बोल्दै उनले उखु किसानलाई प्रतिक्वीन्टल ३५ रुपैयाँ अनुदान रकम दिने निर्णयलाई किसान विरोधी निर्णय भनेका हुन् ।   

‘किसानले पाउँदै आएको प्रति क्वीन्टल ७० रुपैयाँको अनुदान रकम घटाएर ३५ रुपैयाँ मात्र दिने सरकारले अर्को किसान विरोध निर्णय गरेको छ,’ माओवादी केन्द्रका सांसद बस्नेतले भने । 

उनले सरकारको उक्त निर्णयलाई जनविरोधी रबैयाभन्दै त्यसका विरुद्ध किसानहरूले विगत केही दिनदेखि वर्षा र तीजको परवाह नगरी सडकमा धर्ना र प्रदर्शन गरिरहेको सदनलाई जानकारी गराए ।   

बस्नेतले आत्मनिर्भर अर्थतन्त्र, गरिबी निवारण र सामाजिक न्यायका एजेन्डाहरू आजको राष्ट्रिय आवश्यकता र महत्वका विषय वस्तुहरू भएको पनि बताए । 

‘विडम्बना गत वर्ष उखु किसानहरूले पाउनुपर्ने भुक्तानी करिब एक अर्ब ५० करोडभन्दा बढी अनुदान रकम आजसम्म सरकारले भुक्तानी गर्न सकेको छैन,’ उनले भने ।