काठमाडौं– थरुहट थारूवान संयुक्त संघर्ष समितिले नागरिक उन्मुक्ति पार्टी (नाउपा)का संरक्षक रेशमलाल चौधरीले थारू समुदायका नेताहरूविरूद्ध दिएको अभिव्यक्तिप्रति आपत्ति जनाएको छ । 

नेपाल मगर संघका पूर्व अध्यक्ष स्व. गोरे बहादुर खपाङ्गी मगरको स्मृति दिवसको अवसरमा नेपाल मगर संघद्वारा काठमाडौंमा आयोजित कार्यक्रममा चौधरीले दिएको अभिव्यक्तिप्रति संघर्ष समितिले आपत्ति जनाएको हो । 

मन्तव्यको क्रममा संरक्षक चौधरीले आफूलाई थारू नेताहरूले कारागार पठाएको अभिव्यक्ति दिएका थिए ।

 ‘मलाई थारू नेताहरूले झ्यालखाना पठाए भन्ने दिएको आरोपयुक्त अभिव्यक्ति प्रति थरुहट थारूवान संयुक्त सङ्घर्ष समितिको गम्भिर ध्यानाकर्षण भएको छ,’ संयोजक प्रेमीलाल चौधरीद्वारा जारी विज्ञप्तिमा भनिएको छ । 

टीकापुर घटनाबारे गृशचन्द्र लाल संयोजकत्वको उच्चस्तरीय न्यायिक समितिको प्रतिवेदन सार्वजनिक गर्नुपर्ने माग राख्दै सङ्घर्षरत थारू नेताहरूमाथि थरूहट आन्दोलनको मूल मर्म र भावनाविपरीत गम्भिर प्रहार गर्दै चौधरीले लगाएको निराधार आरोप कदापि सैह्य नहुने उनले उल्लेख गरेका छन् । 

चौधरी स्वयम् जेलमा रहँदासहित सम्पूर्ण राजबन्दीहरूको निःशर्त रिहाइका लागि सशक्त आवाज उठाउने थारू नेताहरूमाथि नै निराधार आरोप लगाउनु उनको राजनीतिक बेइमानी भएको संघर्ष समितिको ठहर छ । 

समितिले नाउपाका संरक्षक चौधरीलाई आफ्नो अभिव्यक्ति तुरुन्त फिर्ता लिएर सार्वजनिक रूपमै माफी माग्न भनेको छ । 

‘अब उप्रान्त यस किसिमको गैरजिम्मेवारी अभिव्यक्ति नदिन सचेत एवं सजग गराउँदै गलत आरोप सच्याई अभिव्यक्ति तुरून्त फिर्ता लिई सार्वजनीक रूपमै माफी माग्न थरुहट थारूवान संयुक्त संघर्ष समिति आग्रह गर्दछ,’ विज्ञप्तिमा भनिएको छ ।